مەملەكەت باسشىسى: قازاقستاندا 5 مىڭداي بارلانباعان كەن ورنى بار
پرەزيدەنت قازاق-فرانسۋز بيزنەس فورۋمىندا فرانسۋز كومپانيالارىن ءوزارا ءتيىمدى سەرىكتەستىك ورناتۋعا شاقىردى، دەپ حابارلايدى Kazinform اقوردانىڭ باسپا ءسوز قىزمەتىنە سىلتەمە جاساپ.
«جاھاندىق تەحنولوگيالىق ريەۆوليۋتسيا دامىعان سايىن، سيرەك كەزدەسەتىن مەتالدارعا سۇرانىس گەومەتريالىق پروگرەسسيامەن وسەدى. جالپى، 2040-جىلعا قاراي ونداي مەتالدارعا سۇرانىس ءتورت ەسە، سونىڭ ىشىندە ليتي ەلەمەنتىنە قاجەتتىلىك 10 ەسە ارتادى دەگەن بولجام جاسالىپ وتىر. قازاقستاندا جالپى قۇنى 46 تريلليون دوللارعا باعالاناتىن 5 مىڭداي بارلانباعان كەن ورنى بار. وسى رەتتە اتالعان سالانى بىرلەسە يگەرۋ ىسىندە ەلىمىز سەنىمدى سەرىكتەس بولا الادى. بۇگىندە ءبىز ەۋروپا وداعىنىڭ ەكونوميكاسىنا قاجەتتى 30 سيرەك كەزدەسەتىن مەتالدىڭ 16 سىن وندىرەمىز جانە ەۋروپا نارىعىنىڭ فوسفورعا دەگەن قاجەتتىلىگىنىڭ 70 پايىزىن قامتاماسىز ەتەمىز. ەلىمىزدىڭ اۋماعىندا كەن ورىندارىنىڭ 9 ءتۇرى بار. ءتيىستى ينۆەستيتسيا تابىلسا، ولاردى يگەرۋگە بولادى. وسىعان وراي فرانسۋز كومپانيالارىن ءوزارا ءتيىمدى سەرىكتەستىك ورناتۋعا شاقىرامىز»، - دەدى مەملەكەت باسشىسى.
قاسىم-جومارت توقايەۆ اگرارلىق ازىق-تۇلىك سەكتورىن ىنتىماقتاستىقتىڭ تاعى ءبىر باسىم باعىتى دەپ سانايدى.
پرەزيدەنت جاھاندىق ازىق-تۇلىك تاپشىلىعى جاعدايىندا ەلىمىز اۋىل شارۋاشىلىعى ءونىمىنىڭ ەكسپورتىن 2 ەسە ارتتىرۋدى كوزدەپ وتىرعانىن جەتكىزدى. مەملەكەت باسشىسى مال شارۋاشىلىعى جانە ەگىن شارۋاشىلىعى سالالارىنداعى بىرلەسكەن جوبالارعا جان-جاقتى قولداۋ كورسەتۋگە دايىن ەكەنىن اتاپ ءوتتى.
