مەملەكەت باسشىسى قاۋىپسىزدىك كەڭەسىنىڭ وتىرىسىن وتكىزدى
استانا. KAZINFORM - قاسىم-جومارت توقايەۆتىڭ توراعالىعىمەن قازاقستان رەسپۋبليكاسى قاۋىپسىزدىك كەڭەسىنىڭ كەزەكتى وتىرىسى ءوتتى.
جيىندا ۇلتتىق قاۋىپسىزدىك ستراتەگياسىن جۇزەگە اسىرۋ ءۇشىن قابىلدانعان ۇلتتىق قاۋىپسىزدىك تاۋەكەلدەرىن باسقارۋ جونىندەگى 2021-2025-جىلدارعا ارنالعان ءىس- قيمىل جوسپارىنا ساي بىلتىرعى اتقارىلعان جۇمىستاردىڭ ناتيجەلەرى قاراستىرىلدى.
ۇكىمەت پەن ءبىرقاتار سالالىق مەملەكەتتىك ورگاننىڭ باسشىلارى نەگىزگى كورسەتكىشتەردىڭ ورىندالۋى تۋرالى مالىمەت بەردى. كەڭەس وتىرىسىندا ءالى دە پىسىقتاۋدى قاجەت ەتەتىن، سونىڭ ىشىندە قوعامدىق، ەكونوميكالىق، ەكولوگيالىق جانە اقپاراتتىق قاۋىپسىزدىك باعىتىنداعى ماسەلەلەر تالقىلاندى.
پرەزيدەنت ۇلتتىق قاۋىپسىزدىك ستراتەگياسىنىڭ ىسكە اسىرىلۋى ناقتى ناتيجەلەرمەن باعالانۋعا ءتيىس ەكەنىنە نازار اۋداردى. ونىڭ قوعام ءۇشىن ماڭىزى زور. بۇل رەتتە بارلىق سالانى دامىتۋ بارىسىندا ازاماتتار مەن مەملەكەتتىڭ قاۋىپسىزدىك فاكتورى ەسكەرىلۋگە ءتيىس.
سونىمەن قاتار جيىندا تەرروريزمگە جانە ەكسترەميزمگە قارسى كۇرەستىڭ وزەكتى ماسەلەلەرى قاراستىرىلدى.
ۇلتتىق قاۋىپسىزدىك كوميتەتىنىڭ ءتوراعاسى ەرمەك ساعىمبايەۆ تەرروريستىك جانە ەكسترەميستىك ارەكەتتەردىڭ قاۋپىن ازايتۋ، سونداي-اق تەرروريزمگە قارسى قورعانىستى كۇشەيتۋ ءۇشىن قابىلدانىپ جاتقان شارالار جونىندە باياندادى.
وتىرىس قورىتىندىسى بويىنشا مەملەكەتتىك ورگاندارعا ناقتى تاپسىرما بەرىلدى.
ايتا كەتەيىك، پرەزيدەنت قازاقستان مەن قاتار اراسىنداعى ۇستاپ بەرۋ تۋرالى كەلىسىمدى راتيفيكاتسيالاۋ تۋرالى زاڭعا قول قويدى.
