مەملەكەت باسشىسى ەنەرگەتيكا ءمينيسترى الماسادام ساتقاليەۆتى قابىلدادى

پرەزيدەنتكە ەنەرگەتيكا سالاسىن دامىتۋدىڭ نەگىزگى ماسەلەلەرى مەن ەلىمىزدىڭ وتىن- ەنەرگەتيكا كەشەنىنىڭ بيىلعى 10 ايداعى كورسەتكىشتەرى، سونداي- اق مۇناي- گاز جانە ەنەرگەتيكا باعىتتارىنداعى ءىرى جوبالاردىڭ جۇزەگە اسىرىلۋى جونىندە مالىمەت بەرىلدى.

كەزدەسۋ بارىسىندا الماسادام ساتقالييەۆ اتالعان كەزەڭ ىشىندە قازاقستانداعى مۇناي ءوندىرۋ كولەمى 74,8 ميلليون توننانى، ال مۇناي ونىمدەرىنىڭ ءوندىرىسى 11,2 ميلليون توننانى قۇراعانىن جەتكىزدى. سونىمەن قاتار 48,7 ميلليارد تەكشە مەتر گاز، 93,5 ميلليارد كۆت/ساع ەلەكتر قۋاتى جانە 15,35 مىڭ توننا ۋران وندىرىلگەن.

قاسىم- جومارت توقايەۆقا ۇلتتىق ەلەكتر جەلىسىن دامىتۋ ءۇشىن اتقارىلىپ جاتقان شارالار، بيىل ماۋسىم ايىندا ىسكە قوسىلعان ەلەكتر ەنەرگياسىن نارىقتا ساتۋدىڭ جاڭا مەحانيزمى جونىندە باياندالدى.

مەملەكەت باسشىسىنا قىسقى جىلىتۋ ماۋسىمى قالىپتى ءوتۋ ءۇشىن قوسىمشا باقىلاۋ ورناتىلعانى تۋرالى اقپارات بەرىلدى. اتاپ ايتقاندا، ەنەرگەتيكا نىساندارىن قامتاماسىز ەتۋ ماقساتىندا 5,5 ميلليون توننا كومىر مەن 100 مىڭ توننا مازۋت قورى دايىندالعان.

بۇعان قوسا مەملەكەت باسشىسىنا ۆەدومستۆونىڭ ەل ايماقتارىنا ودان ءارى گاز قۇبىرىن تارتۋ جوسپارى تانىستىرىلدى.

كەزدەسۋ سوڭىندا پرەزيدەنت جىلىتۋ ماۋسىمىنىڭ بارىسىن جانە ەنەرگەتيكا ينفراقۇرىلىمىن جاڭعىرتۋ جوبالارىنىڭ ىسكە اسىرىلۋىن ايرىقشا باقىلاۋدا ۇستاۋدى، سونداي- اق ىشكى نارىقتى جانار- جاعارمايمەن جانە سۇيىتىلعان مۇناي گازىمەن ۇزدىكسىز قامتاماسىز ەتۋ شارالارىن قابىلداۋدى تاپسىردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى