مەملەكەت باسشىسى Nebras Power كومپانياسى ديرەكتورلار كەڭەسىنىڭ ءتوراعاسىن قابىلدادى
دوحا. KAZINFORM - پرەزيدەنت Nebras Power كومپانياسى ديرەكتورلار كەڭەسىنىڭ ءتوراعاسى مۇحاممەد ناسسەر ءال-حادجريدى قابىلدادى، دەپ حابارلايدى اقوردا.
كەزدەسۋدە جاڭارتىلاتىن ەنەرگيا كوزدەرى سالاسىنداعى ينۆەستيتسيالىق ىنتىماقتاستىقتىڭ پەرسپەكتيۆالارى تالقىلاندى.
قاسىم-جومارت توقايەۆ تاياۋدا Nebras Power كومپانياسى مەن «سامۇرىق- ەنەرگو» اكسيونەرلىك قوعامىنىڭ اراسىندا سەمەي گ ە س-ءىنىڭ قۇرىلىسىنا قاتىستى كەلىسىمگە قول قويىلعانىن قۇپتادى. ستانسيانىڭ قۋاتتىلىعى 300 مەگاۆاتت بولادى. پرەزيدەنت بۇل جوبانىڭ استانا مەن دوحانىڭ ۇزاقمەرزىمدى ستراتەگيالىق سەرىكتەستىگىن نىعايتۋداعى ءرولىن جوعارى باعالادى. اتالعان باستامانى تابىستى جۇزەگە اسىرۋ ءۇشىن قازاقستان ۇكىمەتىنىڭ جان-جاقتى قولداۋ كورسەتەتىنىن راستادى.
مەملەكەت باسشىسىنىڭ ايتۋىنشا، ەلىمىز 2030-جىلعا قاراي ەنەرگيا بالانسىنداعى جاڭارتىلاتىن قۋات كوزدەرىنىڭ ۇلەسىن 15 پايىزعا دەيىن ارتتىرۋعا نيەتتى.
مۇحاممەد ناسسەر ءال-حادجري قاسىم-جومارت توقايەۆقا بىرلەسكەن جوبانى ىسكە اسىرۋدىڭ نەگىزگى كەزەڭدەرى جونىندە مالىمەت بەرىپ، «جاسىل» ەنەرگەتيكا سالاسىنداعى قازاقستاننىڭ الەۋەتى زور ەكەنىن ايتتى.
ايتا كەتسەك، قاتار استاناسى دوحا قالاسىندا 7,8 -جەلتوقسان كۇندەرى جاھاندىق سىن-قاتەرلەردى تالقىلاپ، ءتۇرلى سالاداعى يننوۆاتسيالىق شەشىمدەردى ىزدەۋگە ارنالعان حالىقارالىق فورۋم (Doha Forum) وتەدى.
بۇعان دەيىن حابارلاعانىمىزداي، قاتار كومپانياسى قاشاعان گازىن وڭدەيتىن زاۋىتتىڭ 75 پايىز اكسياسىن ساتىپ الادى.
