مەملەكەت باسشىسى ەممانيۋەل ماكرونمەن رياد قالاسىندا كەزدەستى
استانا. KAZINFORM - مەملەكەت باسشىسى قاسىم-جومارت توقايەۆ رياد قالاسىندا ءوتىپ جاتقان One Water سامميتى اياسىندا فرانسيا پرەزيدەنتى ەممانيۋەل ماكرونمەن كەزدەستى، دەپ حابارلايدى اقوردا.
پرەزيدەنت ءوزىنىڭ جاقىندا فرانسياعا جاساعان مەملەكەتتىك ساپارىن ىقىلاسپەن ەسكە الىپ، قازاقستان دەلەگاتسياسىنا كورسەتكەن ەرەكشە قوناقجايلىعى ءۇشىن ەممانيۋەل ماكرونعا ريزاشىلىق ءبىلدىردى.
مەملەكەت باسشىسى قازاق-فرانسۋز قارىم-قاتىناستارىن بەرىك ستراتەگيالىق سەرىكتەستىك دەڭگەيىنە جەتكىزۋ ءۇشىن پاريجدە قول جەتكىزىلگەن ۋاعدالاستىقتاردى جۇزەگە اسىرۋدىڭ ماڭىزدى ەكەنىن اتاپ ءوتتى.
- كەلىسسوزدەردىڭ قورىتىندىسىنا جانە ءتيىستى قۇجاتتارعا قول قويىلعانىنا كوڭىلىم تولدى. فرانسياعا مەملەكەتتىك ساپارىم ۇزاق مەرزىمدى ەكونوميكالىق وسىمگە جانە ەلدەرىمىز اراسىنداعى بايلانىستى نىعايتۋعا جاسالعان ماڭىزدى قادام بولدى. بىرنەشە اپتادان كەيىن-اق ءتۇرلى باعىتتاعى نەگىزگى كەلىسىمدەردىڭ جۇزەگە اسىپ، ناقتى ناتيجە بەرە باستاعانى قۋانتادى، - دەدى قاسىم-جومارت توقايەۆ.
ەممانيۋەل ماكرون قازاقستان مەن فرانسيا اراسىنداعى ىقپالداستىقتىڭ قارقىندى دامىپ كەلە جاتقانىنا توقتالىپ، كليماتتىڭ وزگەرۋىنە قارسى كۇرەس جانە «جاسىل» ەكونوميكانى دامىتۋ سەكتورلارىندا كۇش بىرىكتىرۋدىڭ ءمانى زور ەكەنىن جەتكىزدى.
تاراپتار ەنەرگيا تيىمدىلىگى، تازا تەحنولوگيالار، سۋ رەسۋرستارىن باسقارۋ، يننوۆاتسيالار، دەرەكتەر الماسۋ جانە جاساندى ينتەللەكت سالالارىنداعى ىنتىماقتاستىقتى جانداندىرۋ پەرسپەكتيۆالارىن تالقىلادى.
كەزدەسۋدە پرەزيدەنتتەر وڭىرلىك جانە حالىقارالىق كۇن تارتىبىندەگى وزەكتى ماسەلەلەر جونىندە پىكىر الماستى.
