مەملەكەت باسشىسى ماۋلەن اشىمبايەۆتى قابىلدادى

ماۋلەن اشىمبايەۆ سەناتتىڭ قازىرگى قىزمەتى مەن الداعى جوسپارلارى تۋرالى مالىمەت بەردى.

ايتۋىنشا، ءۇشىنشى سەسسيا باستالعاننان بەرى پارلامەنت 28 زاڭ قابىلداعان، ونىڭ بەسەۋىنە دەپۋتاتتار باستاماشى بولعان. اتاپ ايتقاندا، پرەزيدەنت جولداۋلارى مەن تاپسىرمالارىن جۇزەگە اسىرۋ ماقساتىندا تۇرعىن ءۇي ساياساتىنا، ءبىلىم بەرۋ جانە بالالار قۇقىعىن قورعاۋعا، ءبىلىم سالاسىنداعى جيناقتاۋ جۇيەسىنە، بيرجا ساۋداسى مەن كاسىپكەرلىككە، سوت جۇيەسىن رەفورمالاۋ مەن ەسىرتكىنىڭ زاڭسىز اينالىمىنا قارسى كۇرەسكە قاتىستى زاڭدار قابىلدانعان.

قازىر پارلامەنتتە جۇمىسشىلاردىڭ ەڭبەك قۇقىقتارىن قورعاۋ، كرەاتيۆتى يندۋستريانى قولداۋ، ورمان شارۋاشىلىعى جانە ەرەكشە قورعالاتىن تابيعي اۋماقتار جونىندەگى زاڭ جوبالارى قارالىپ جاتىر. بۇل - سەناتورلاردىڭ باستاماسىمەن قولعا الىنعان قۇجاتتار.

جىل باسىنان بەرى سەناتتا 50 گە جۋىق ءىس- شارا وتكىزىلگەنىن، سەناتورلار ۇكىمەتكە 67 دەپۋتاتتىق ساۋال جولداعانىن ايتتى. سونىمەن قاتار پارلامەنتارالىق ىنتىماقتاستىقتى كەڭەيتۋ اياسىندا 40 تان استام حالىقارالىق كەزدەسۋ ۇيىمداستىرىلعان.

كەلەسى جىلى جوعارى پالاتادا بيۋدجەت، قۇرىلىس، سۋ، سالىق كودەكستەرى، «تۇركىستان قالاسىنىڭ ەرەكشە مارتەبەسى تۋرالى» جانە «تۇتىنۋشىلاردىڭ قۇقىعىن قورعاۋ تۋرالى» زاڭدار قارالاتىنىن مالىمدەدى. سونداي- اق جۇمىسشى ماماندىقتارى جىلىنا ارنالعان پارلامەنتتىك تىڭداۋلار وتكىزۋ جوسپارلانىپ وتىر.

قازاقستاننىڭ ورنىقتى دامۋ سالاسىنداعى ۇلتتىق ماقساتتارى مەن مىندەتتەرىن ىسكە اسىرۋدى مونيتورينگتەۋ جونىندەگى پارلامەنتتىك كوميسسيانىڭ جۇمىسى تۋرالى اقپارات بەردى. اتالعان كوميسسيا مەملەكەت باسشىسىنىڭ تاپسىرماسىمەن قۇرىلعان بولاتىن.

پرەزيدەنتتىڭ وڭىرلەردى ودان ءارى دامىتۋ جونىندە جۇكتەگەن مىندەتتەرىن پالاتانىڭ باسىمدىق بەرەتىن باعىتتارىنىڭ ءبىرى ەكەنىن اتاپ ءوتتى. بۇل رەتتە سەنات ءماسليحاتتار دەپۋتاتتارىمەن جۇمىستى جانداندىرا تۇسكەن.

الەمدىك جانە ءداستۇرلى دىندەر ليدەرلەرىنىڭ VIII سەزىنە دايىندىق بارىسىن باياندادى.

اتالعان جيىن 2025 -جىلدىڭ قىركۇيەك ايىنا جوسپارلانىپ وتىر.

پرەزيدەنت بۇعان دەيىن ەنەرگەتيكا ءمينيسترى الماسادام ساتقالييەۆتى قابىلداعان بولاتىن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى