مەملەكەت باسشىسى ۇلى بريتانيانىڭ جاڭادان تاعايىندالعان پرەمەر-مينيسترىنە قۇتتىقتاۋ جەدەلحاتىن جولدادى
استانا. KAZINFORM - پرەزيدەنت قاسىم-جومارت توقايەۆ قازاقستان حالقىنىڭ جانە جەكە ءوزىنىڭ اتىنان كير ستارمەردى لەيبوريستەر پارتياسىنىڭ جالپى سايلاۋداعى ايقىن جەڭىسىمەن جانە ونىڭ بىرىككەن كورولدىكتىڭ پرەمەر-ءمينيسترى لاۋازىمىنا تاعايىندالۋىمەن قۇتتىقتادى.
- وسى تاريحي ساتتە ۇلىبريتانيا حالقى پارتيانىڭ كەلەشەكتى كوزدەگەن باعدارلاماسىنا جانە ءسىزدىڭ ءتيىمدى كوشباسشىلىعىڭىزعا سەنىم ءبىلدىردى. قازاقستان جاقىندا قول قويىلعان ستراتەگيالىق سەرىكتەستىك جانە ىنتىماقتاستىق تۋرالى كەلىسىم اياسىندا ۇلى بريتانيامەن سان قىرلى ىقپالداستىقتى ودان ءارى دامىتۋعا بەيىلدى، - دەپ جازىلعان جەدەلحاتتا.
سونىمەن قاتار مەملەكەت باسشىسى جاڭادان سايلانعان پرەمەر-ءمينيستردىڭ جاۋاپتى جۇمىسىنا تابىس، ۇلى بريتانيا حالقىنا باق-بەرەكە تىلەدى.
