مەملەكەت باسشىسى كورول II ابداللانى «التىن قىران» وردەنىمەن ماراپاتتادى
استانا. KAZINFORM - قاسىم-جومارت توقايەۆ يوردانيا كورولى II ابداللا بەن ءال-حۋسەينگە قازاقستان رەسپۋبليكاسىنىڭ ەڭ جوعارى مەملەكەتتىك ناگراداسى - «التىن قىران» وردەنىن تابىستادى، دەپ حابارلايدى اقوردانىڭ باسپا ءسوز قىزمەتى.
پرەزيدەنت ماراپاتتاۋ راسىمىندە سويلەگەن سوزىندە قازاقستان مەن يوردان حاشيميت كورولدىگىنىڭ اراسىندا بەرىك سەرىكتەستىك قاتىناستار ورناعانىن، كورول II ابداللانىڭ قازاق-يوردان بايلانىستارىن نىعايتۋعا ەلەۋلى ۇلەس قوسقانىن اتاپ ءوتتى.
- ۇلى مارتەبەلى كورولدىڭ اينىماس نيەتىنىڭ ارقاسىندا ءبىز ەكونوميكا مەن ينۆەستيتسيالىق ىقپالداستىقتان باستاپ مادەني جانە ءبىلىم سالالارىنا دەيىن ءوزارا مۇددەمىزگە ساي كەلەتىن ىنتىماقتاستىعىمىزدى نىعايتتىق. اسا كورنەكتى مەملەكەت قايراتكەرى، بەيبىتشىلىكتىڭ قورعانى ءارى دانالىقتىڭ ۇلگىسى رەتىندە ءسىزدىڭ ءىسىڭىز الەمدەگى كوپ ادامعا جىگەر بەرەدى. قازاقستان حالقى ءسىزدى ەرەكشە قۇرمەتتەيدى. يوردانيانىڭ تەك سەرىكتەس قانا ەمەس، ناعىز دوستاس ەل ەكەنىن ماقتان تۇتامىز. ۇلى مارتەبەلى كورولدىڭ بايىپتى باسشىلىعىمەن يوردانيا وڭىردەگى تۇراقتىلىقتى، ءدىنارالىق ديالوگتى جانە گۋمانيتارلىق قىزمەتتى ىلگەرىلەتۋدە شەشۋشى ءرول اتقارىپ وتىر. بۇل قۇندىلىقتار قازاقستاننىڭ بەيبىتشىلىكتى، تولەرانتتىلىق پەن ديپلوماتيانى جاقتايتىن ۇستانىمىنا ساي كەلەدى. ءسىزدىڭ زور كۇش-جىگەرىڭىز بەن ۇدايى قولداۋىڭىزدىڭ ارقاسىندا ءبىز ءوزارا ىنتىماقتاستىعىمىزدىڭ كەلەشەگىنە زور ۇمىتپەن قارايمىز، - دەدى مەملەكەت باسشىسى.
كورول II ابداللا بەن ءال-حۋسەين قازاقستاننىڭ ەڭ جوعارى مەملەكەتتىك ماراپاتىنا لايىق كورگەنى ءۇشىن قاسىم-جومارت توقايەۆقا جانە باۋىرلاس قازاق حالقىنا ريزاشىلىعىن ءبىلدىردى.
وسىعان دەيىن پرەزيدەنتتىڭ يوردانياعا رەسمي ساپارى اياسىندا 10 قۇجاتقا قول قويىلعانى تۋرالى حابارلادىق.
