مەملەكەت باسشىسى جاپونيا پرەمەر-ءمينيسترىنىڭ ارناۋلى كەڭەسشىسى اكيحيسا ناگاشيمانى قابىلدادى
استانا. KAZINFORM - پرەزيدەنت جاپونيا پرەمەر-ءمينيسترىنىڭ ارناۋلى كەڭەسشىسى، پارلامەنت وكىلدەر پالاتاسىنىڭ دەپۋتاتى اكيحيسا ناگاشيمانى قابىلدادى.
- قازاقستان جاپونيامەن ستراتەگيالىق سەرىكتەستىكتى دامىتۋعا ەرەكشە ءمان بەرەدى. ەكى ەل اراسىندا دوستىق پەن ءوزارا تۇسىنىستىككە نەگىزدەلگەن تىعىز ىنتىماقتاستىق ورناعان. ءبىز «قازاقستان مەن جاپونيانىڭ اراسى الىس بولعانىمەن، دوستىعىمىز بەرىك» دەپ ايتامىز، - دەدى مەملەكەت باسشىسى.
قاسىم-جومارت توقايەۆ مەملەكەتتەر اراسىنداعى ساۋدا-ەكونوميكالىق، ينۆەستيتسيالىق جانە عىلىمي-تەحنيكالىق بايلانىستاردى كەڭەيتۋگە ايتارلىقتاي الەۋەت بار ەكەنىنە توقتالدى. پرەزيدەنت قازاقستان ەكونوميكاسىنا تارتىلعان جاپون ينۆەستيتسياسىنىڭ كولەمى 8 ميلليارد دوللاردان اسقانىن ايتتى.
سونداي-اق ەلىمىزدىڭ شەتەلدىك ينۆەستورلارعا، سونىڭ ىشىندە جاپونيانىڭ وزىق كومپانيالارىنا قولايلى جاعداي جاساۋعا دايىن ەكەنىن اتاپ ءوتتى.
ايتا كەتەيىك، كەشە پرەزيدەنت رەسەي فەدەراتسياسى ۇكىمەتىنىڭ ءتوراعاسى ميحايل ميشۋستينمەن كەزدەسكەن بولاتىن.
