مەملەكەت باسشىسى جاڭا بيۋجەت كودەكسىنە قول قويدى
استانا. KAZINFORM - قازاقستان رەسپۋبليكاسىنىڭ بيۋجەت كودەكسىنىڭ ءماتىنى باسپا سوزدە جاريالانادى، دەپ حابارلايدى اقوردانىڭ باسپا ءسوز قىزمەتى.
➤ كودەكستىڭ ءبىرىنشى بلوگى مەملەكەتتىك قارجى تۋرالى ەرەجەلەرگە ساي سالىق-بيۋجەت، اقشا-نەسيە جانە فيسكالدى ساياساتتى بايلانىستىرۋعا باعىتتالعان.
➤ ەكىنشى بلوك مەملەكەتتىك ورگانداردىڭ دەربەستىگى مەن جاۋاپكەرشىلىگىن ارتتىرا وتىرىپ، بيۋدجەت پروتسەسىن وڭتايلاندىردى. بيۋجەت پروتسەستەرىنىڭ مەرزىمدەرى مەن كەزەڭدەرى قىسقارتىلدى. بيۋجەتتىك باعدارلامالار اكىمشىلەرىنىڭ وكىلەتتىكتەرى مەن جاۋاپكەرشىلىگىن ەداۋىر كەڭەيتۋ ەسەبىنەن بلوكتىق بيۋدجەت ەلەمەنتتەرى ەنگىزىلدى. مەملەكەتتىك ورگاندارعا بيۋدجەتتىك باعدارلاما شىعىستارىنىڭ 15 پايىزى كولەمىندەگى قاراجاتتى دەربەس باسقارۋ قۇقىعى بەرىلدى. مەملەكەتتىك ورگاندار بيىل جۇمسالماعان بيۋدجەت قارجىسىن كەلەسى جىلدىڭ قاڭتار ايىنان باستاپ پايدالانا الادى. بۇل شىعىستاردى ۇزدىكسىز قارجىلاندىرۋعا مۇمكىندىك بەرەدى.
➤ ءۇشىنشى بلوك پارلامەنتتىك باقىلاۋدى كۇشەيتۋگە ارنالعان. مەملەكەتتىك كەپىلدىكتەردى، مەملەكەت كەپىلگەرلىكتەرىن بەرۋ ءليميتىن، ۇكىمەتتىك بورىش ليميتىن جانە جەرگىلىكتى اتقارۋشى ورگاندار بورىشىن، كۆازيمەملەكەتتىك سەكتور سۋبەكتىلەرىنىڭ سىرتقى قارىز ءليميتىن پارلامەنت قاراستىرىپ، بيۋجەت تۋرالى زاڭمەن بەكىتەدى.
➤ ءتورتىنشى بلوك بيۋدجەتتىڭ كىرىس بولىگىن جوسپارلاۋ ساپاسىن ارتتىرۋ جانە بيۋجەت قارجىسىن ءتيىمدى پايدالانۋ جونىندە پارمەندى شارالار قابىلداۋدى كوزدەيدى. كودەكستە كۆازيمەملەكەتتىك سەكتور سۋبەكتىلەرىنە قاتىستى مەملەكەتتىك ديۆيدەند ساياساتىنىڭ نەگىزگى ەرەجەلەرى بەلگىلەنگەن.
➤ بەسىنشى بلوك جيناق فۋنكسياسىنا باسا نازار اۋدارا وتىرىپ، ۇلتتىق قوردى پايدالانۋ شارتتارىن بەلگىلەيدى. ۇلتتىق قوردى پايدالانۋ پرەزيدەنت بەكىتكەن ماقساتتى باعدارلارمەن شەكتەلەدى. قوردىڭ قاراجاتىن ىشكى قارجى قۇرالدارىنا سالۋعا رۇقسات ەتىلمەيدى. بۇل اقشانى بيۋدجەتتەن تىس پايدالانۋعا جول بەرمەيدى. ۇلتتىق قوردىڭ نىسانالى ترانسفەرتى تەك جالپىحالىقتىق ماڭىزى بار نىساندار مەن جوبالاردى قارجىلاندىرۋعا عانا پايدالانىلادى. ءول ۇشىن ءتيىستى كريتەريلەر ەنگىزىلدى.
➤ التىنشى بلوك كۆازيمەملەكەتتىك سەكتور سۋبەكتىلەرىنىڭ بورىشىن قوسا العاندا، مەملەكەتتىڭ قارىز ساياساتىنا باقىلاۋدى كەڭەيتۋگە باعىتتالدى. ۋاكىلەتتى ورگاندار مەملەكەتتىك سەكتوردىڭ بورىشتىق مىندەتتەمەلەرىنە بولجاۋ، مونيتورينگ جانە باعالاۋ جۇرگىزۋ شارالارىن جۇزەگە اسىرادى. كۆازيمەملەكەتتىك سەكتوردىڭ سىرتقى بورىش ءليميتى رەسپۋبليكالىق بيۋدجەت تۋرالى زاڭمەن بەلگىلەنەدى.
➤ تۇزەتۋلەردىڭ جەتىنشى بلوگى بيۋجەتارالىق قاتىناستاردى جەتىلدىرە ءتۇستى. ازاماتتاردى بيۋجەت قاراجاتىن ءبولۋ پروتسەسىنە بەلسەندى تارتۋ ءۇشىن حالىق قاتىساتىن بيۋجەت ءتارتىبى زاڭنامالىق نەگىزدە بەكىتىلگەن.
بۇعان دەيىن مەملەكەت باسشىسى قاسىم-جومارت توقايەۆتىڭ ۇلتتىق قۇرىلتايدىڭ IV وتىرىسىندا سويلەگەن ءسوزى جاريالاندى.
