مەملەكەت باسشىسى حالىقارالىق كۇرەس فەدەراتسياسىنىڭ پرەزيدەنتى نەناد ۆالوۆيچتى قابىلدادى
استانا. KAZINFORM - قاسىم-جومارت توقايەۆ كۇرەستىڭ حالىقارالىق سپورت ارەناسىنداعى ەلىمىزدىڭ بەدەلىن نىعايتۋدا ايتارلىقتاي رولگە يە ەكەنىن ايتتى. سونىمەن قاتار الەمدىك تۋرنيرلەردە تابىستى ونەر كورسەتىپ جۇرگەن وتاندىق بالۋانداردىڭ جەتىستىكتەرىن جوعارى باعالادى.
مەملەكەت باسشىسى قازاقستاننىڭ حالىقارالىق كۇرەس فەدەراتسياسىمەن ستراتەگيالىق ىنتىماقتاستىقتى ودان ءارى ارتتىرۋعا نيەتتى ەكەنىن مالىمدەدى. قاسىم-جومارت توقايەۆتىڭ ايتۋىنشا، ينفراقۇرىلىمدى جەتىلدىرۋ، دايارلىقتىڭ وزىق ادىستەرىن ەنگىزۋ جانە ەلىمىزدە حالىقارالىق تۋرنيرلەردى وتكىزۋ وسى سپورت ءتۇرىنىڭ تانىمالدىلىعى مەن باسەكەگە قابىلەتتىلىگىن ەسەلەۋگە ىقپال ەتەدى.
نەناد ۆالوۆيچ قوناقجايلىق تانىتقانى ءۇشىن قاسىم-جومارت توقايەۆقا ريزاشىلىعىن ءبىلدىرىپ، ىقپالداستىقتى جالعاستىرۋعا دايىن ەكەنىن جەتكىزدى. ول قازاقستاندى فەدەراتسيانىڭ ماڭىزدى سەرىكتەسى دەپ اتاپ ءوتىپ، ءبىزدىڭ ۇلتتىق كۇرەس مەكتەبىنىڭ زور تابىستارىنا توقتالدى. نەناد ۆالوۆيچتىڭ ايتۋىنشا، قازاقستاندىقتاردىڭ دەنى ساۋ ۇلت قالىپتاستىرۋعا ۇمتىلىسى سپورت پەن باسقا دا سالالاردا جوعارى ناتيجەگە قول جەتكىزۋگە سەپتىگىن تيگىزەدى.
كەزدەسۋدە قازاقستاننىڭ الەمدىك سپورت قوعامداستىعىنداعى بەدەلىن نىعايتۋ جانە باسىمدىققا يە سپورت ءتۇرى رەتىندە كۇرەستى ودان ءارى ىلگەرىلەتۋ پەرسپەكتيۆاسى تالقىلاندى.
كەزدەسۋ سوڭىندا مەملەكەت باسشىسى قازاقستانداعى كۇرەستى دامىتۋعا قوسقان ۇلەسى ءۇشىن حالىقارالىق كۇرەس فەدەراتسياسىنىڭ پرەزيدەنتىن II دارەجەلى «دوستىق» وردەنىمەن ماراپاتتادى.
ايتا كەتەيىك، بۇعان دەيىن پرەزيدەنت ماجارستاننىڭ سىرتقى ىستەر ءمينيسترى پەتەر سيارتونى قابىلداعان.
