مەملەكەت باسشىسى «Astana Motors» كومپانياسىنىڭ نەگىزىن قالاۋشى نۇرلان سماعۇلوۆتى قابىلدادى
استانا. KAZINFORM - پرەزيدەنتكە كاسىپورىن جۇمىسىنىڭ ناتيجەسى، قازاقستانداعى اۆتوموبيل ونەركاسىبىن دامىتۋعا جانە ونىڭ جەرگىلىكتى ۇلەسىن ارتتىرۋعا باعىتتالعان يندۋستريالىق جوبالاردى جۇزەگە اسىرۋ جايىندا مالىمەت بەرىلدى - دەپ جازدى اقوردانىڭ باسپا ءسوز قىزمەتى.
نۇرلان سماعۇلوۆتىڭ ايتۋىنشا، «Astana Motors» قۇرامىنداعى كومپانيالار بىلتىر جەرگىلىكتى جانە رەسپۋبليكالىق بيۋدجەتكە 140 ميلليارد تەڭگە كولەمىندە سالىق، باج، الىمدار جانە باسقا دا مىندەتتى تولەمدەر تولەگەن. بۇگىندە كاسىپورىندا 6489 ادام جۇمىس ىستەيدى. ونىڭ ىشىندە 1615 ادام وندىرىستە قىزمەت ەتەدى.
Hyundai Trans Kazakhstan جانە Hyundai Trans Almaty زاۋىتتارى بىلتىر 48857 جەڭىل كولىك جانە 981 كوممەرتسيالىق تەحنيكا شىعارعان.
قاسىم-جومارت توقايەۆقا Chery, GWM (Haval) Changan ماركالى اۆتوكولىكتەردى وندىرەتىن مۋلتيبرەندتىك Astana Motors Manufacturing Kazakhstan زاۋىتىنىڭ قۇرىلىسى جۇرگىزىلىپ جاتقانى تۋرالى باياندالدى. بۇل زاۋىتتىڭ قۋاتى جىلىنا 90 مىڭ اۆتوكولىك شىعارۋعا جەتەدى. ونىڭ 40 پايىزى ىشكى نارىقتا ساتىلسا، 60 پايىزى ەكسپورتقا جىبەرىلەدى. قۇرىلىس جۇمىستارىن 2025 -جىلدىڭ اقپان ايىندا اياقتاۋ جوسپارلانعان. «Astana Motors» كومپانياسى 2027 -جىلى دانەكەرلەۋ جانە شاناقتى بوياۋمەن قوسا العاندا، كولىكتى تولىعىمەن ۇساق بولشەكتەردەن قۇراستىرۋعا كوشۋدى باستى ماقسات ەتىپ وتىر.
مەملەكەت باسشىسى وڭدەۋ ونەركاسىبىن، سونىڭ ىشىندە ماشينا جاساۋ ءىسىن دامىتۋ يندۋستريالىق ساياساتتىڭ باسىمدىعى سانالاتىنىن اتاپ ءوتتى.
