مەملەكەت باسشىسى ارمەنيانىڭ سىرتقى ىستەر ءمينيسترى ارارات ميرزوياندى قابىلدادى
استانا. KAZINFORM - پرەزيدەنت ارمەنيانىڭ سىرتقى ىستەر ءمينيسترىن قابىلداۋ بارىسىندا ەكى ەل پرەزيدەنتتەرىنىڭ بىلتىر قازاقستان مەن ارمەنياعا جاساعان ساپارلارى ءوزارا قارىم-قاتىناستى جان-جاقتى دامىتۋعا سەرپىن بەرگەنىن اتاپ ءوتتى.
بۇل تۋرالى اقوردانىڭ باسپا ءسوز قىزمەتى حابارلادى.
- ءسىزدىڭ استاناعا العاشقى رەسمي ساپارىڭىز ەكى ەل اراسىنداعى ىنتىماقتاستىقتى ودان ءارى نىعايتۋ تۇرعىسىنان ماڭىزدى. ءبىزدىڭ ارميان حالقى مەن ءسىزدىڭ مەملەكەتكە دەگەن قۇرمەتىمىز بولەك، - دەدى پرەزيدەنت.
قاسىم-جومارت توقايەۆ ەلىمىز بەيبىتشىلىك تۋرالى كەلىسىم جوباسى بويىنشا كەلىسسوزدەردىڭ اياقتالىپ، ەريەۆان مەن باكۋ اراسىنداعى مەملەكەتارالىق قارىم-قاتىناستىڭ جاندانۋىن قولدايتىنىن جەتكىزدى. پرەزيدەنتتىڭ پىكىرىنشە، بۇل ايتۋلى وقيعا ارمەنيا مەن ازەربايجان اراسىندا بەيبىت كەلىسىم ورناتۋعا نەگىز قالاپ، ايماقتىڭ قازاقستان جانە ورتالىق ازيا مەملەكەتتەرىمەن ىنتىماقتاستىعىن بەلسەندى تۇردە دامىتۋعا، سونداي-اق قاۋىپسىزدىكتى نىعايتۋعا ىقپال ەتەدى.
ءوز كەزەگىندە ارمەنيانىڭ سىرتقى ىستەر ءمينيسترى قوناقجايلىق تانىتقانى ءۇشىن ريزاشىلىعىن ءبىلدىردى.
- ءبىز ءسىزدىڭ ەكى ەل اراسىنداعى ىقپالداستىققا قاتىستى ۇستانىمىڭىزدى قولدايمىز، - دەدى ارارات ميرزويان.
ول ارمەنيا مەن قازاقستاننىڭ سىرتقى ىستەر مينيسترلىكتەرى جانە باسقا دا ۆەدومستۆولارى قاسىم-جومارت توقايەۆتىڭ بىلتىر ەريەۆانعا جاساعان رەسمي ساپارى بارىسىندا قول جەتكىزىلگەن ۋاعدالاستىقتاردى جۇزەگە اسىرۋ بويىنشا جۇمىس ىستەپ جاتقانىن جەتكىزدى.
كەزدەسۋ بارىسىندا ساۋدا-ەكونوميكالىق، ينۆەستيتسيالىق، كولىك-لوگيستيكالىق، مادەني-گۋمانيتارلىق سالالارداعى ەكىجاقتى بايلانىستى ىلگەرىلەتۋ پەرسپەكتيۆاسى قاراستىرىلدى. قازاقستان پرەزيدەنتى وتاندىق بيزنەس وكىلدەرىنىڭ ارمەنياعا تاۋار تاسىمالىن 350 ميلليون دوللارعا دەيىن ۇلعايتۋعا دايىن ەكەنىن مالىمدەدى.
