مەملەكەت الدىندا قارىزى بار كومپانيالاردىڭ كوبىنە ءىس قوزعالعان
استانا. KAZINFORM - مەملەكەتتىك كىرىس كوميتەتى اۋديت دەپارتامەنتىنىڭ باسقارما باسشىسى قايسار ارىن مەملەكەت الدىندا قارىزى بار كومپانيالارعا قاتىستى تۇسىنىك بەردى.
- مەملەكەت الدىندا قارىزى بار كومپانيالار مەن جەكە كاسىپكەرلەردىڭ بورىشىن ءوندىرىپ الۋ بويىنشا سۇراقتار وتە اۋقىمدى. سوندىقتان ءتيىستى شەشىمدى قاجەت ەتەدى. قازىرگى كەزدە مەملەكەت الدىندا سالىق تولەۋشىلەردىڭ قارىزى 450 ميلليارد تەڭگەدەن اسادى. ونىڭ نەگىزگى بولىگىن ءوندىرىپ الۋدا قيىندىقتار تۋدىراتىن ءبىر سەبەبى - ول ءبىراز كومپانيالارعا قىلمىستىق ءىس قوزعالعان. بۇل رەتتە جالعان شوت- فاكتۋرا جازۋ، سالىقتان جالتارۋ باپتارى بار. وسى جاعدايلاردا ءوندىرىپ الۋدا كەدەرگىلەر بار، - دەدى ق. ارىن الەۋمەتتىك جەلىدە وتكەن بريفينگىدە.
وسى ورايدا ول قاي جاعدايدا سالىق ورگاندارى بورىشكەرلەردىڭ مۇلكىنە ءوندىرىپ الۋ شاراسىن قولداناتىنىن ءتۇسىندىردى.
- زاڭدى تۇلعالار، جەكە كاسىپكەرلەر سالىقتى ۋاقىتىندا تولەمەگەندە، سالىق كودەكسى اياسىندا حابارلاما جولدانادى. بۇل رەتتە تاۋەكەل دارەجەسى بار. ياعني جوعارى دارەجەلى تاۋەكەل بولسا، حابارلاما جىبەرىلگەننەن كەيىن، ءبىر جۇمىس كۇنى ىشىندە ءبىز مۇلكىنە شەكتەۋ ءىس-قيىلدارىن اتقارۋىمىز كەرەك. ال ورتا دارەجەلى تاۋەكەل ايماعىندا بولسا، وندا 15 جۇمىس كۇنىندە مۇلكىن شەكتەۋ جۇمىستارىن جۇزەگە اسىرامىز. وسى ءتارتىپ سالىق كودەكسىنىڭ 120-بابىندا كورسەتىلگەن. مۇلكىن شەكتەۋ دەگەنىمىز نە؟ سالىق تولەۋشىنىڭ تىركەۋگە قويىلعان مۇلكىنە بايلانىستى جانە بۋحگاتەرلىك تەڭگەرىمىندە تۇرعان مۇلىكىنە شەكتەۋ قويامىز. سونىمەن قاتار، ءوندىرىپ الۋ ءىس-قيمىلدارىن اتقارامىز، - دەدى كوميتەت وكىلى.
ايتا كەتەيىك، بيىل ناۋرىز ايىندا وتكەن ۇلتتىق قۇرىلتايدىڭ IV وتىرىسىندا مەملەكەت باسشىسى قاسىم-جومارت توقايەۆ ءادىل ءارى ءتيىمدى سالىق جۇيەسىن قۇرۋ كەرەك ەكەنىن اتاپ ءوتتى.
