ەممانيۋەل ماكروننىڭ وزبەكستانعا ساپارى: ەكى ەل باسشىسى نە تۋرالى ۋاعدالاستى
سامارقاند قالاسىندا وزبەكستان پرەزيدەنتى شاۆكات ميرزيەيەۆ پەن فرانسيا پرەزيدەنتى ەممانيۋەل ماكرون شاعىن قۇرامدا كەزدەسۋ وتكىزدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
وزبەكستان باسشىسىنىڭ باسپا ءسوز قىزمەتىنەن مالىمدەگەندەي، ەكى ەل پرەزيدەنتى وزبەك- فرانسۋز ىنتىماقتاستىعىن جان- جاقتى ارتتىرۋ ماسەلەلەرىن تالقىلاپ، ەكىجاقتى قاتىناستى ستراتەگيالىق ارىپتەستىك دەڭگەيىنە شىعارۋعا ۋاعدالاستى.
سونداي- اق كەيىنگى جىلدارى ەكى مەملەكەت اراسىندا سان سالاداعى قارىم- قاتىناستىڭ قارقىندى دامىپ كەلە جاتقانى اتاپ ءوتىلدى. تاۋار اينالىمى مەن بىرلەسكەن كاسىپورىندار سانى ارتىپ، پەرسپەكتيۆالى ينۆەستيتسيالىق جوبالار پورتفەلى 10 ميلليارد ەۋرودان استى. فرانسيانىڭ دامۋ اگەنتتىگىمەن 1 ميلليارد ەۋروعا باعالانعان ستراتەگيالىق ىنتىماقتاستىق باعدارلاماسى جۇزەگە اسىپ جاتىر.
مۇنىمەن قاتار قوس تاراپ «جاسىل» ەنەرگەتيكا، شيكىزات ءوندىرۋ جانە ونى وڭدەۋ، سۋمەن قامتاماسىز ەتۋ، لوگيستيكا، ينفراقۇرىلىمدى دامىتۋ، تۋريزم جانە باسقا دا سالالارداعى جاڭا ءىرى جوبالاردى ىلگەرىلەتۋ جونىندەگى شارالاردى تالقىلادى.
فرانسيا پرەزيدەنتى وزبەكستاننىڭ ورتالىق ازيا ايماعىندا ودان ءارى نىق دامۋىنا، رەسپۋبليكانىڭ دۇنيەجۇزىلىك ساۋدا ۇيىمىنا قوسىلۋىنا جانە ەۋرووداقپەن كەڭەيتىلگەن ارىپتەستىك پەن ىنتىماقتاستىق تۋرالى كەلىسىمگە تاياۋ ارادا قول قويۋىنا قولداۋ كورسەتۋگە دايىن ەكەنىن جەتكىزدى.
كەزدەسۋ بارىسىندا وزبەكستاندا فرانسۋز ءتىلىن ۇيرەنۋگە دەگەن قىزىعۋشىلىقتىڭ ارتقانى ايتىلدى. سايكەسىنشە، تاراپتار سامارقاند قالاسىندا فرانسۋز اليانسىنىڭ فيليالىن اشۋ ۇسىنىسىن ماقۇلدادى.
بۇعان قوسا ەكى ەل باسشىلارى تاشكەنت قالاسىندا وزبەك- فرانسۋز جوعارى وقۋ ورنىن قۇرۋ ءىسىن جەدەلدەتۋ جانە فرانسۋز ءتىلى وقىتۋشىلارىن دايارلاۋ سالاسىنداعى ىنتىماقتاستىقتى كەڭەيتۋ تۋرالى ۋاعدالاستى.
اۆتور
ءاليحان اسقار
