مەكەمەلىك ماراپاتتاردىڭ ءبىرىڭعاي ستاندارتىن جاساۋ قاجەت - پرەزيدەنت

- ءبىز سوڭعى جىلدارى مەملەكەتتىك ناگرادالار ماسەلەسىن قايتا قاراپ، ءبىر جۇيەگە تۇسىردىك. ەندى ۆەدومستۆولىق (مەكەمەلىك) ماراپاتتاردى رەتكە كەلتىرۋ قاجەت. مەملەكەتتىك ورگاندار بۇل جۇمىستى نازاردان تىس قالدىردى. ناقتى ەرەجە جوق، بارىنە ورتاق مالىمەتتەر قورى دا جوق. سونىڭ كەسىرىنەن كەيبىر ماراپاتتار ورىنسىز تاراتىلىپ جاتىر. ءتىپتى، ءبىر مەملەكەتتىك ورگاننىڭ توسبەلگىسىن ءبىر ادام بىرنەشە رەت العان جايتتار دا كەزدەسەدى، - دەدى قاسىم-جومارت توقايەۆ ۇلتتىق قۇرىلتايدا.

مەملەكەت باسشىسىنىڭ ايتۋىنشا، ۆەدومستۆولىق ناگرادا - ناعىز بىلىكتى ماماندارعا عانا بەرىلەتىن، سول ارقىلى كاسىبي مارتەبەنى كوتەرەتىن ماڭىزدى ناگرادا.

- بۇعان بەي-جاي قاراۋعا بولمايدى. سوندىقتان مەكەمەلىك ماراپاتتاردىڭ ءبىرىڭعاي ستاندارتىن جانە ءتىزىمىن جاساۋ قاجەت. ارينە، ءار مەكەمەنىڭ ءوز ەرەكشەلىگىن ەسكەرگەن ءجون. ءبىراق بارىنە ورتاق ۇستانىم بولۋى كەرەك. قۇزىرلى ورگاندارعا وسى شارۋانى قولعا الۋدى تاپسىرامىن، - دەگەن مىندەت جۇكتەدى پرەزيدەنت.

بۇعان دەيىن مەملەكەت باسشىسى قازاق تىلىندە تۇسىرىلگەن مۋلتفيلمدەر كوپ بولۋى قاجەتتىگىن ايتقان ەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى