مۇحامەدي ۇلى سوتتا كۇتپەگەن مالىمدەمە جاسادى
استانادا ءوتىپ جاتقان سوتتا بۇرىنعى مادەنيەت جانە سپورت ءمينيسترى ارىستانبەك مۇحامەدي ۇلى كۋاگەرلەر وتباسىن قورلاپ جاتقانىن ايتىپ، سۋديادان ولاردىڭ ءبىرىن جاۋاپقا تارتۋدى سۇرادى.
ەلوردادا ەكس-مينيستر ارىستانبەك مۇحامەدي ۇلىنىڭ ۇستىنەن تاعى ءبىر قىلمىستىق ءىس قارالىپ جاتىر. بۇل جولى وعان رەيدەرلىك جاسادى دەپ ايىپ تاعىلدى. قىلمىستىق ءىس قالاداعى «ديپلومات» قوناق ۇيىنە قاتىستى قوزعالدى.
بۇگىن قىلمىستىق ىستەر جونىندەگى اۋدانارالىق سوتتا ارىستانبەك مۇحامەدي ۇلى كۋاگەرلەردىڭ ءبىرىن قىلمىستىق جاۋاپقا تارتۋدى سۇرادى. سەبەبى ول ونىڭ وتباسىن قورلايتىن سوزدەر ايتقان، ءبىراق ناقتى دالەل كەلتىرمەگەن.
«سوت بارىسىندا سوتتى مەنسىنبەۋدىڭ كۋاگەرى بولدىق. تەك شىندىقتى ايتامىن دەپ انت بەرگەندەر سوتتا جالعان مالىمدەمە جاسادى. قىلمىستىق ءىستىڭ رەيدەرلىك، لاۋازىمدى وكىلەتىن تەرىس پايدالانۋ بويىنشا قارالىپ جاتقانى ايتىلىپ جاتىر، ال جابىرلەنۋشىلەر مەن كۋاگەرلەر ۇيالماي جالعان سويلەۋمەن بولدى. جەكە باسىم مەن وتباسىمدى قورلايتىن سوزدەر ايتىپ جاتىر. جابىرلەنۋشى ايەلىم ەكەۋمىز تۋرالى «دۆا ساپوگا پارا»، ۇلىمدى «القاش»، ايەلىمنىڭ اناسىن «كارى، ەسى دۇرىس ەمەس» دەپ اتادى»، - دەدى ەكس-مينيستر.
ول سوزىنە ناقتى دالەلدەر كەلتىردى.
«ز. ك. اتتى كۋاگەر «ديپلومات» قوناق ءۇيىن سەرىك قارىمساقوۆ باسقارعانىن بىرنەشە رەت ايتتى. سوعان قاراماستان مەن سەرىك قارىمساقوۆتىڭ قوناقۇيگە كىرۋىنە تىيىم سالىپپىن. الايدا ول مالىمدەمەسىنە قاتىستى ءبىر دە ءبىر دالەل كەلتىرمەدى. تاعى ءبىر د. م. اتتى كۋاگەر قىزمەتكەرلەردەن وسى جاعداي تۋرالى ەستىگەنىن ايتتى. ول 2020-جىلعى قاراشادان باستاپ Bali SPA ورتالىعىن سەرىك قارىمساقوۆتىڭ باسقارعانىن ايتتى. Bali SPA- نىڭ «ديپلومات» قوناق ءۇيى قۇرىلىمىندا ەكەنى بەلگىلى بولدى. مۇندا لوگيكا قايدا؟ مەنىڭ سەرىك قارىمساقوۆتىڭ قوناق ۇيگە كىرۋىنە تىيىم سالعانىمدى ايتادى. الايدا (قوناق ۇيدەگى - ەسك.) ۇيىمداستىرۋ-قارجىلىق ماسەلەنىڭ ءبارىن قارىمساقوۆ شەشكەن. سوندىقتان د. م. اتتى كۋاگەردى قىلمىستىق جاۋاپقا تارتۋدى سۇرايمىن»، - دەدى ارىستانبەك مۇحامەدي ۇلى سوتتا.
سونداي-اق، بۇرىنعى ەكس-مينيستر وزىنەن جاۋاپ الىنۋىنا قارسى ەمەس ەكەنىن مالىمدەدى.
وتىرىستا سۋديا ءابينۇر قارابايەۆ كۋاگەرلەردىڭ جاۋابىنا كەڭەسۋ بولمەسىندە باعا بەرىلەتىنىن جەتكىزدى.
«سوت ولار جالعان كۋالىك ەتكەن دەپ تانىسا، قوسىمشا قاۋلى شىعارادى. سودان كەيىن ولاردى جاۋاپقا تارتۋ تۋرالى شەشىم قابىلدايدى»، - دەدى سۋديا.
سونىمەن قاتار، ارىستانبەك مۇحامەدي ۇلى كۋاگەرلەرگە ناقتى دالەلگە سۇيەنىپ، جاۋاپ بەرۋىن سۇرادى.
ايتا كەتەيىك، بۇرىنعى مينيستر قىلمىستىق كودەكستىڭ 24-بابى 3-بولىگى، 249-بابى 1-بولىگى (رەيدەرلىك ارەكەتكە وقتالۋ) ، 28-بابى 3-بولىگى، 250-بابى 1-بولىگى بويىنشا ايىپتالىپ وتىر. ەكس- مينيستر ارىستانبەك مۇحامەدي ۇلى 8 جىلعا باس بوستاندىعىنان ايىرىلعان ەدى.
Massaget.kz
