مەديتسينالىق ساقتاندىرىلماعاندارعا جۇرگىزۋشى كۋالىگى بەرىلمەيدى: مينيستر تالاپتى ءتۇسىندىردى
دەنساۋلىق ساقتاۋ ءمينيسترى اجار عينيات الەۋمەتتىك مىندەتتى الەۋمەتتىك مەديتسينالىق ساقتاندىرۋ جۇيەسىنە ەنبەگەن ادامدارعا جۇرگىزۋشى كۋالىگىن بەرۋدى شەكتەۋ ۇسىنىسىنا قاتىستى تۇسىنىك بەردى، دەپ حابارلايدى Kazinform.
«دەنساۋلىق ساقتاۋ مينيسترلىگىنىڭ كەيبىر مەملەكەتتىك قىزمەتتەردى شەكتەۋ تۋرالى ۇسىنىستارىنا قاتىستى توقتالسام، بۇل باعىتتا الەمدىك تاجىريبە زەردەلەندى. كوپتەگەن ەلدە، ياعني گەرمانيا، نورۆەگيا، ۇلى بريتانيا جانە باسقا دا دامىعان ەلدەردە ءتيىستى تالاپتار بار. ەگەر جۇرگىزۋشى كۋالىگىن العىڭىز كەلسە، مەديتسينالىق ساقتاندىرۋ سۇرالادى. اتاپ ايتقاندا، باسقا مەملەكەتكە ساپارلاپ بارعان كەزدە دە مەديتسينالىق ساقتاندىرۋسىز ەشكىمدى قابىلدامايتىنىن بىلەسىزدەر»، - دەدى ا. عينيات پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.
ايتۋىنشا، جىل سايىن قازاقستاندا شامامەن 3 مىڭ ادام جول-كولىك اپاتىنان كوز جۇمادى.
«جول اپاتتارى كوپ تىركەلىپ جاتىر. مەن كۇنىنە 10 نەمەسە ودان دا كوپ جازاتايىم وقيعا تۋرالى اقپارات الامىن. زارداپ شەككەندەردىڭ جارتىسى قايتىس بولادى، نەگىزىنەن ەڭبەككە قابىلەتتى جاستاعى جاستار، بالالار. ولاردىڭ تەڭ جارتىسى اۋىر حالدە مەديتسينالىق ۇيىمدارعا جاتقىزىلادى. ادامدار مۇنداي جاعدايعا تاپ بولعاندا، «ءسىز ساقتاندىرىلعانسىز با؟» دەپ سۇراعان مەديتسينالىق قىزمەتكەرگە قالاي قارايدى دەپ ويلايسىز؟ ال ءبىز بۇل جەردە شۇعىل كومەك تۋرالى ايتىپ وتىرعان جوقپىز، سەبەبى جەدەل كومەك ونسىز دا ءبىرىنشى كەزەكتە ىسكە اسىرىلادى. ءبىراق كەيبىر تراۆماتولوگيالىق، ورتوپەديالىق، كۇردەلى وپەراتسيالار ولار مىندەتتى الەۋمەتتىك مەديتسينالىق ساقتاندىرۋ جۇيەسىنە ەنگىزىلگەن. سوندىقتان مەديتسينا قىزمەتكەرلەرىنە ناۋقاستان «ەرتەڭ وتا جاساۋ كەرەك، ءسىز ساقتاندىرۋ جۇيەسىندە بارسىز با؟» دەپ سۇراپ تۇرۋ ىڭعايسىز. مۇنىڭ ءبارى ادام دەنساۋلىعىنا قاتىستى»، - دەدى مينيستر.
بۇل تۇرعىدا ا. عينيات ءار ادام مەديتسينالىق ساقتاندىرۋ جۇيەسىنە قوسىلۋى كەرەك ەكەنىن ايتتى.
ايتا كەتەيىك، بۇعان دەيىن ساقتاندىرىلماعان ادامدارعا دەنساۋلىق جانە وسى سالاعا قاتىستى مەملەكەتتىك قىزمەتتەردى الۋ كەزىندە ءتيىستى شەكتەۋ ەنگىزۋ ۇسىنىلدى. ماسەلەن، كولىك جۇرگىزۋ، قارۋ-جاراق ساقتاۋ جانە باسقا دا باعىتتاردا وسىنداي شەكتەۋلەر قاراستىرىلماق.
