مۇگەدەكتىگى بار ادامدارعا ارنالعان جۇمىس ورىندارى كۆوتاسىن ورىنداماعاندارعا جاۋاپكەرشىلىك كۇشەيتىلمەك

بۇل تۋرالى ءماجىلىس دەپۋتاتتارىنىڭ ساۋالىنا پرەمەر-مينيستر ءاليحان سمايىلوۆتىڭ جاۋابىندا ايتىلعان، دەپ حابارلايدى Kazinform.

ۇكىمەت باسشىسىنىڭ دەرەگىنشە، بۇگىنگى تاڭدا مۇگەدەكتىگى بار ادامدار ءۇشىن جۇمىس ورىندارى كۆوتالارىن جەرگىلىكتى اتقارۋشى ورگاندار ۇيىم قىزمەتكەرلەرىنىڭ تىزىمدىك سانىنا قاراي 2- دەن 4 پايىزعا (شتات سانى 50 ادامنان اساتىن ۇيىمدار ءۇشىن - %2، 100-250 ادام ءۇشىن - %3، سانى 250 ادامنان اساتىن ۇيىمدار ءۇشىن - %4) دەيىنگى مولشەردە بەلگىلەيدى. بۇدان بولەك، جۇمىس بەرۋشىگە جۇكتەمەنى ىنتالاندىرۋ جانە ازايتۋ ءۇشىن وسى جىلدان باستاپ مۇگەدەك ادامداردىڭ جالاقىسىن مەملەكەت سۋبسيديالاۋ تەتىگى ىسكە قوسىلدى. ماسەلەن، سۋبسيديالاۋ جۇمىسقا ورنالاستىرۋدىڭ ءۇش جىلى ىشىندە جۇرگىزىلەدى: ءبىرىنشى جىل – 70، ەكىنشى جىل - 65 جانە ءۇشىنشى جىل - 60 پايىز.

«اكىمشىلىك قۇقىق بۇزۋشىلىق تۋرالى» قازاقستان رەسپۋبليكاسى كودەكسىنىڭ 98-بابىنا سايكەس جۇمىس بەرۋشىنىڭ قازاقستان رەسپۋبليكاسىنىڭ حالىقتى جۇمىسپەن قامتۋ سالاسىنداعى زاڭناماسىن مۇگەدەك ادامدار ءۇشىن بەلگىلەنگەن جۇمىس ورىندارىنىڭ كۆوتاسىن ورىنداماۋ تۇرىندە جاساعان بۇزۋشىلىعى ەسكەرتۋ جاساۋعا الىپ كەلەتىنىن ايتا كەتكەن ءجون. بۇل رەتتە اكىمشىلىك جازا قولدانىلعاننان كەيىن ءبىر جىل ىشىندە قايتالاپ بۇزۋ لاۋازىمدى ادامدارعا كاسىپكەرلىك سۋبەكتىسىنە بايلانىستى بەستەن ون ايلىق ەسەپتىك كورسەتكىش مولشەرىندە ايىپپۇل سالۋعا الىپ كەلەدى. قازىرگى ۋاقىتتا ەڭبەك جانە حالىقتى الەۋمەتتىك قورعاۋ مينيسترلىگى جۇمىس بەرۋشىلەردىڭ بەلگىلەنگەن كۆوتانى ورىنداماعانى ءۇشىن جاۋاپكەرشىلىكتى كۇشەيتۋ ماسەلەسىن قاراپ جاتىر»، - دەدى ءاليحان سمايىلوۆ.

پرەمەر-ءمينيستردىڭ اتاپ وتۋىنشە، ءتيىستى زاڭنامالىق تۇزەتۋلەر زاڭنامادا بەلگىلەنگەن تارتىپپەن پارلامەنت ماجىلىسىنە ەنگىزىلەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى