ماگيستراتۋرا مەن دوكتورانتۋرادا وقيتىندار اسكەردەن بوساتىلا ما
استانا. KAZINFORM - شەتەلدە قاشىقتان ءبىلىم الۋ اسكەردەن جالتارۋعا نەگىز بولا المايدى. بۇل تۋرالى قارۋلى كۇشتەرى باس شتابى ۇيىمداستىرۋ-جۇمىلدىرۋ جۇمىسى دەپارتامەنتى باستىعىنىڭ ورىنباسارى فارحات ايداربايەۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ءمالىم ەتتى.
- ءبىلىم الۋدى جالعاستىرۋ ءۇشىن اسكەري قىزمەتكە شاقىرۋدى كەيىنگە قالدىرۋ شەت مەملەكەتتەردىڭ وقۋ ورىندارىندا قاشىقتان وقىتۋدى قولدانۋ ارقىلى ءبىلىم الاتىن ازاماتتارعا بەرىلمەيدى، - دەدى ول.
سونداي-اق، ول فارحات ايداربايەۆ كۇندىزگى بولىمدە جوعارى ءبىلىم الىپ جۇرگەن ستۋدەنتتەر اسكەردەن قالاي بوساتىلاتىنىن ءتۇسىندىردى.
-ءبىلىم الۋدى جالعاستىرۋ ءۇشىن اسكەري قىزمەتكە شاقىرۋدى كەيىنگە قالدىرۋ ءبىلىم بەرۋدىڭ ءاربىر دەڭگەيى ءۇشىن ءبىر رەت بەرىلەدى. جوعارى وقۋ ورنىنان كەيىنگى ءبىلىم الاتىن ازاماتقا اسكەري قىزمەتكە شاقىرۋدى كەيىنگە قالدىرۋ رەزيدەنتۋرادا، ماگيستراتۋرادا نەمەسە دوكتورانتۋرادا وقۋ كەزىندە تيىسىنشە ءبىر رەت بەرىلەدى.
سونىمەن بىرگە، ءبىلىم الۋدى جالعاستىرۋ ءۇشىن اسكەري قىزمەتكە شاقىرۋدى كەيىنگە قالدىرۋ رۋحاني (ءدىني) ءبىلىم بەرۋ ۇيىمدارىندا ءبىلىم الاتىن ازاماتتارعا، ەگەر وسى ۇيىم قازاقستان رەسپۋبليكاسىنىڭ ءبىلىم بەرۋ سالاسىنداعى زاڭناماسىنا سايكەس ءبىلىم بەرۋ قىزمەتىن جۇزەگە اسىرعان جاعدايدا بەرىلەدى، - دەدى قارۋلى كۇشتەرى باس شتابىنىڭ وكىلى.
بۇعان دەيىن 28 -تامىزدا قازاقستاندا رەسمي تۇردە كۇزگى اسكەرگە شاقىرۋ ناۋقانى باستالعانىن جازعان ەدىك.
اۆتور
ەسىمجان ناقتىباي
