مايقايىڭداعى اپات: قۇتقارۋشىلارعا شاعىن ەكسكاۆاتور كومەككە كەلدى
كەنىش اۋماعىنداعى اۆتوبۋستى ىزدەستىرۋگە قوسىمشا تەحنيكا جۇمىلدىرىلدى. سالماعى 3,5 توننالىق شاعىن ەكسكاۆاتور ويىق تۇبىندە قازۋ جۇمىستارىن جۇرگىزەدى، دەپ حابارلايدى Kazinform.
پاۆلودار وبلىسى توتەنشە جاعدايلار دەپارتامەنتىنىڭ قۇتقارۋشىلارى شۇڭقىردىڭ تۇبىندە ماركشەيدەر رەيكاسىن ورناتۋ جانە اۆتوبۋستىڭ بولجامدى ورنالاسقان جەرىن سيگنالدىق لەنتامەن بەلگىلەۋ بويىنشا جۇمىستاردى جۇرگىزدى.
«تەحنيكانىڭ ءوتۋى ءۇشىن باعانالى جولدى كەڭەيتۋ جۇمىستارى جالعاسۋدا. جالپى وپىرىلعان جەردەن 110 مىڭنان استام توننا توپىراق پەن تاۋ جىنىستارى شىعارىلدى. سونىمەن قاتار، جازاتايىم وقيعانىڭ سەبەپتەرىن تەرگەۋ جونىندەگى كوميسسيانىڭ جۇمىسى جالعاسۋدا. كوميسسيا مۇشەلەرى ويىقتىڭ ۇستىڭگى قاباتتارىنداعى وپىرىلۋ اسەرىن انىقتاۋ ماقساتىندا كەنىشتىڭ استىنا ءتۇسىپ، زەردەلەپ شىقتى»، - دەپ حابارلادى وڭىرلىك توتەنشە جاعدايلار دەپارتامەنتىنەن.
اۆتوبۋستى ىزدەۋ جۇمىستارىنا بارلىعى 142 ادام، 50 تەحنيكا، 3 كينولوگيالىق توپ جانە 2 ۇشقىشسىز ۇشۋ اپپاراتى جۇمىلدىرىلدى.
ەسكە سالا كەتەيىك، 4- قاڭتار كۇنى «مايقايىڭ التىن» كەن ورنىندا ۇلكەن ويىق ماڭىنداعى توپىراق وپىرىلىپ، 4 ادام مىنگەن اۆتوبۋس جەر استىنا ءتۇسىپ كەتكەن بولاتىن.
