«مايقايىڭ التىن» ا ق-نىڭ التىن كەنىشىندە جۇمىسكەردى تەحنيكا جانشىپ كەتتى

قايعىلى وقيعا كەشە تۇستەن كەيىن بولعان.

- التىن شاحتاسىندا كوپ جىلداردان بەرى موتور جوندەۋشى بولىپ ەڭبەك ەتكەن ەر ازامات كولىك قۇرالىن جوندەۋ كەزىندە كوز جۇمدى. كۋاگەرلەردىڭ سوزىنشە، ول كەنىشكە ءتۇسىپ، ىستەن شىعىپ تۇرعان تەحنيكانى قاراپ جاتقاندا ەكىنشى كەن تيەگىش كولىك ابايسىزدا جانشىپ كەتكەن. سالدارىنان 1992 -جىلعى ەر ازامات جانشىلىپ قالعان. مارقۇمنىڭ وتباسى بار، سوڭىندا ايەلى مەن 2018 -جىلعى تۋعان بالاسى قالدى، - دەپ حابارلادى باياناۋىل اۋدانى مايقايىڭ كەنتىنىڭ اكىمى ەرباتىر مولداتايەۆ.

پاۆلودار وبلىستىق پوليتسيا دەپارتامەنتىنىڭ باسپا ءسوز قىزمەتى ابايسىزدا ادام ولىمىنە اكەپ سوقتىرعان قاۋىپسىزدىك تەحنيكاسى ەرەجەلەرىن بۇزۋ دەرەگى بويىنشا قىلمىستىق ءىس قوزعالعانىن حابارلادى.

- تەحنيكانىڭ جۇرگىزۋشىسى انىقتالىپ، پوليتسيا بولىمىنە جەتكىزىلدى. وقيعانىڭ ءمان-جايى مەن سەبەپتەرى تەرگەۋ بارىسىندا انىقتالاتىن بولادى»، - دەپ مالىمدەدى پوليتسيادان.

ال مەملەكەتتىك ەڭبەك ينسپەكتسياسى كوميتەتىنىڭ پاۆلودار وبلىسى بويىنشا دەپارتامەنتى باسشىسىنىڭ مىندەتىن اتقارۋشى ابىلاي سابىروۆ جازاتايىم وقيعاعا قاتىستى تەرگەۋ-تەكسەرۋ شارالارى ۇيىمداستىرىلاتىنىن حابارلادى.

- قازىر وقيعانى تەرگەۋ كوميسسياسى قۇرىلىپ جاتىر. ءبىزدىڭ باسقارمانىڭ وكىلدەرى وعان جەتەكشىلىك ەتەدى نەمەسە كوميسسيا قۇرامىنا ەنەدى. ازىرشە وقيعانىڭ ءمان-جايى تۋرالى ايتا المايمىز، - دەدى باسقارما باسشىسىنىڭ مىندەتىن اتقارۋشى.

ەسكە سالا كەتەيىك، بيىل 4-قاڭتاردا مايقايىڭ التىن كەنىشىندە ىشىندە ادامدار بار اۆتوبۋس جەر استىنا ءتۇسىپ كەتتى.

ويىق استىندا قالعان قۇتقارۋشىلاردىڭ دەنەسى ۇزاق ىزدەلىپ، ەڭ سوڭعىسى شىلدە توپىراق اراسىنان قازىلىپ الىندى.

ال كەنىشتىڭ ءوزى 9 اي وتكەندە قايتادان ىسكە قوسىلدى.

اۆتور

مۇرات اياعان

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى