ماتچ قيىنعا سوقتى، باستىسى جەڭىس بىزدە - ءادىل بەكەتايەۆ
استانا. KAZINFORM - قازاقستان حوككەي قۇراماسىنىڭ ويىنشىسى ءادىل بەكەتايەۆ قىسقى ازيا ويىندارىنداعى وتاندىق ەرلەر كومانداسىنىڭ تۇعىرلى جەڭىسىنەن كەيىن اسەرى تۋرالى ايتىپ بەردى.
- كوڭىل كۇيدى جەتكىزۋ مۇمكىن ەمەس، ەلدىڭ تۋىن الىپ شىققان مەن ءۇشىن ۇلكەن جاۋاپكەرشىلىك بولدى. تۋدى الىپ شىققان سپورتشىلار التىن جۇلدە المايدى دەگەندى ەستىپ، قوبالجىعانىم بار. قازىر يىعىمنان جۇك تۇسكەندەي بولىپ تۇرمىن. بۇل ەلدىڭ جەڭىسى، جانكۇيەرلەردىڭ جەڭىسى، جاقىندارىمنىڭ جەڭىسى. سەزىمدى ايتىپ جەتكىزۋ مۇمكىن ەمەس، - دەدى ءادىل بەكەتايەۆ Kazinform اگەنتتىگىنىڭ تىلشىسىنە سۇحبات بەرە تۇرىپ.
وسى ورايدا قىسقى ازيا ويىندارىنىڭ جەڭىمپازى جەڭىسىن وتباسى مەن جاقىن جاندارىنا ارنايتىنىن جەتكىزدى.
- ءار ماتچتان كەيىن جەڭىسكە جەتەيىن، جەتپەيىن ۇنەمى العاش بولىپ وتباسىم، جاقىندارىم حابارلاسادى، قولداۋ كورسەتەدى. جالپى ماتچ قيىنعا سوقتى، باستىسى جەڭىس بىزدە، - دەپ تولىقتىردى جەرلەسىمىز.
بۇعان دەيىن حابارلاعانىمىزداي، ازيادا-2025 قىسقى ويىندارىندا حوككەيدەن قازاقستان ەرلەر قۇراماسى چەمپيون اتاندى.
فينالدا، قازاقستاندىق جىگىتتەر جاپونيا قۇراماسىمەن كۇش سىناستى.
ايتا كەتەيىك، ءادىل بەكەتايەۆ قىسقى ازيا ويىندارىنىڭ اشىلۋ سالتاناتىندا ەلىمىزدىڭ تۋىن الىپ شىقتى. ول قازاقستان رەسپۋبليكاسىنىڭ حوككەيدەن سپورت شەبەرى، جاستار اراسىنداعى الەم چەمپيوناتىنىڭ قولا جۇلدەگەرى جانە جەڭىمپازى.
سونداي-اق ءادىل بەكەتايەۆ ءبىزدىڭ اگەنتتىك تىلشىسىمەن قىتايعا قارسى ويىن تۋرالى ايتقان ەدى.
