ماسكەۋدەن تابىلعان قازاقستاندىق جاۋىنگەردىڭ سۇيەگى ەلگە اكەلىنەدى
ماسكەۋدەگى قازاقستاننىڭ ەلشىلىگىندە ەكىنشى دۇنيەجۇزى سوعىسىندا قازا تاپقان قازاقستاندىق جاۋىنگەردىڭ سۇيەگىن تاپسىرۋ ءراسىمى ءوتتى، دەپ حابارلايدى Kazinform ەلشىلىككە سىلتەمە جاساپ.
ولاردى وسى جىلدىڭ مامىر ايىندا ماسكەۋ تۇبىندەگى اپالشينو اۋىلى ماڭىنان «ەحو ۆوينى» توبى ىزدەپ تاپقان.
جاۋىنگەردىڭ مەدالونىندا ساقتالعان جازبانىڭ ارقاسىندا قىزىلوردا وبلىسى قازالى اۋداندىق ۆوەنكوماتىنان اسكەرگە شاقىرىلىپ، 144-اتقىشتار ديۆيزياسىنىڭ 785-اتقىشتار پولكىنىڭ قۇرامىندا سوعىسىپ، 1941-جىلى 7- قاراشادا ماسكەۋدى قورعاۋ كەزىندە قازا تاپقان سەيلان مامەتوۆتىڭ (1912-جىلى تۋعان) جەكە باسىن انىقتاۋ مۇمكىن بولدى.
قازاقستاننىڭ رەسەيدەگى ەلشىسى داۋرەن ابايەۆ بۇگىنگى شارا بولاشاق ۇرپاق ءۇشىن قۇربان بولعان جاۋىنگەرلەرگە تاعزىم ەكەنىن اتاپ ءوتتى.
«سول كەزدەگى ادامداردىڭ ەرلىگى تۋرالى ەستەلىك قازاقستاندىقتاردىڭ جۇرەگىندە ماڭگى قالادى، كىتاپتاردا، اندەردە، مونۋمەنتتەردە، مەموريالداردا، مۇراجايلار ەكسپوزيتسيالارىندا جانە كوشە اتاۋلارىندا بەينەلەنەدى، - دەپ اتاپ ءوتتى داۋرەن ابايەۆ. - سىزدەردىڭ ەڭبەكقورلىعىڭىز بەن ادالدىعىڭىز تاڭ قالدىرادى. سىزدەر تاريحي جاد پەن ازاتتىعىمىز ءۇشىن كۇرەسكەن تۇلعالاردى قۇرمەتتەۋگە باعا جەتپەس ۇلەس قوساسىزدار».
ءوز كەزەگىندە «ەحو ۆوينى» ىزدەۋ جاساعىنىڭ كومانديرى گەنناديي يۆانوۆ سەيلان مامەتوۆ سياقتى جاۋىنگەرلەردىڭ ارقاسىندا جاۋ ماسكەۋدى الا الماعانىن اتاپ ءوتتى.
«ول ءوز ءومىرىن جەڭىس جولىندا قۇربان ەتتى. ءوزىن ايامادى، قورىقپادى، بەرىلمەدى، اسكەري بورىشىن سوڭىنا دەيىن ورىندادى. قازىر بەيبىت ءومىر ءسۇرىپ جاتقانىمىز ءۇشىن العىسىمىز شەكسىز»، - دەپ اتاپ ءوتتى گەننادي يۆانوۆ.
سەيلان مامەتوۆتىڭ تۋىستارى ءالى تابىلعان جوق. سۇيەگى قازاقستانعا جەتكىزىلىپ، تولىق اسكەري قۇرمەتپەن جەرلەنەدى.
قازا تاپقان جاۋىنگەرلەردىڭ سۇيەگىن تابۋ بويىنشا قازاقستاندىق جانە رەسەيلىك ىزدەۋ توپتارىنىڭ بىرلەسكەن جۇمىسى جالعاسادى.
