ماسكەۋدە قاڭتار وقيعاسى تۋرالى دەرەكتى فيلم كورسەتىلدى
استانا. KAZINFORM - ماسكەۋدە حالىق شارۋاشىلىعىنىڭ جەتىستىكتەرى كورمەسىندەگى «قازاقستان» پاۆيلونىندا «قاڭتار. مەملەكەتتىك توڭكەرىس ارەكەتى» دەرەكتى فيلمىنىڭ كورسەتىلىمى ءوتتى.
شاراعا مەملەكەتتىك ورگانداردىڭ، حالىقارالىق جانە قوعامدىق ۇيىمداردىڭ، عىلىمي جانە ساراپتامالىق قوعامداستىقتىڭ وكىلدەرى، ماسكەۋدەگى قازاق دياسپوراسىنىڭ مۇشەلەرى قاتىستى.
«2022-جىلعى قاڭتارداعى قايعىلى وقيعالار قازاقستاننىڭ جاڭا تاريحىنىڭ شەجىرەسىندە ايرىقشا ورىن الدى. ولاردىڭ ساياسي پروتسەس ۆەكتورى مەن ديناميكاسىنا اسەر ەتۋ اۋقىمىن اسىرا باعالاۋ قيىن. قاڭتار ەلىمىزدەگى وزگەرىستەردىڭ كاتاليزاتورى بولدى. سوندىقتان سول كۇندەردەگى وقيعالاردى وبەكتيۆتى، بەيتاراپ جانە ءبىرجاقتىلىقتان ادا ءتۇسىنۋ ۇلكەن ماڭىزعا يە»، - دەدى قازاقستاننىڭ رەسەيدەگى ەلشىسى داۋرەن ابايەۆ فيلم تانىستىرىلىمىندا.
ەلشى بۇل ءفيلمدى رەسەيدە، ساراپشىلار مەن جالپى جۇرتشىلىعى وسى تاقىرىپقا قىزىعۋشىلىق تانىتاتىن ەلدە كورسەتۋ ماڭىزدى ەكەنىن اتاپ ءوتتى.
جازۋشى، «كوركەم ادەبيەت» باسپاسىنىڭ باس رەداكتورى گەورگي پرياحين فيلمدە جانە تۇتاستاي العاندا قازاقستان باسشىلىعىنىڭ شەشىمدەرىندە ادالدىق پەن اشىقتىقتى كورگەنىن ايتتى.
«ماعان بارىنەن بۇرىن قازاقستان پرەزيدەنتى قاسىم-جومارت توقايەۆتىڭ ەل حالقىمەن قارىم-قاتىناسىنداعى شىنشىلدىعى ۇنادى. قازىر مۇنىڭ جاڭا گەنەراتسيا جانە قاراپايىم ادامعا دەگەن جاڭا قارىم-قاتىناس ەكەنى بەلگىلى»، - دەپ اتاپ ءوتتى جازۋشى.
ونىڭ ايتۋىنشا، رەسپۋبليكا باسشىلىعىنىڭ بۇگىنگى ساياساتى ءوز حالقىنا قىزمەت ەتۋگە باعىتتالعان.
«بۇل فيلمدە ماعان راقىمشىلىق تۋرالى ەپيزود ۇنادى. مۇنداي ارەكەتتى تەك كۇشتى ادام جانە حالىقتىڭ ۇلكەن قولداۋىن سەزىنەتىن باسشى عانا جاساي الادى»، - دەپ تۇيىندەدى گەورگي پرياحين.
«جوعارى ەكونوميكا مەكتەبى» ع ز ۋ ازاماتتىق قوعامدى زەرتتەۋ ورتالىعىنىڭ باس ساراپشىسى ۆياچەسلاۆ يۆانوۆتىڭ ايتۋىنشا، فيلم سول وقيعالاردى جاريالاۋداعى ماڭىزدى كەزەڭ بولىپ سانالادى.
«رەجيسسەرلەر بارىنشا تىرىسقان، ولار وقيعالار حرونولوگياسىن تۋرا، ايقىن تۇردە كورسەتتى. بۇل ءبىزدى سول وقيعالارعا اپاراتىن ناعىز دەرەكتى فيلم. وندا اناليتيكالىق اقپارات بار جانە وسى قايعىلى وقيعانىڭ قايدان باستالعانىن باياندادى، فيلم بولىپ جاتقان پروتسەستەردىڭ ەۆوليۋتسياسىن جانە ولاردىڭ سالدارىن كورسەتەدى»، - دەدى ساراپشى.
ساراپشى قازاقستان حالقى باستان كەشكەن بۇل وقيعالار رەسەي ءۇشىن دە اۋىر بولعانىن جەتكىزدى.
«بۇل فيلمدى كورگەندە ەل باسشىلىعى مەن ۇ ق ش ۇ بويىنشا ارىپتەس ەلدەردىڭ ناقتى رەاكسياسى بولماعاندا، قازاقستان رەسپۋبليكاسىنىڭ قانداي سىن-قاتەر الدىندا تۇرعانىن جانە قايعىلى جاعدايدىڭ اۋقىمى قانداي بولۋى مۇمكىن ەكەنىن تۇسىنۋگە بولادى»، - دەدى ر ع ا الەمدىك ەكونوميكا جانە حالىقارالىق قاتىناستار ينستيتۋتى ديرەكتورىنىڭ مىندەتىن اتقارۋشى سەرگەي افونتسيەۆ.
س. افونتسيەۆتىڭ ايتۋىنشا، فيلمدە بيلىكتىڭ ناقتى ايماقتارداعى ەكونوميكالىق تالاپتاردى شەشۋگە دەگەن تالپىنىسىندا ادامدارعا نە قاجەت ەكەنىنە نازار اۋدارىلدى جانە تولىققاندى سىندارلى بولعانى ايقىن كورسەتىلگەن.
«ءبىراق ودان كەيىن ادامداردىڭ مۇددەسى قىزىقتىرمايتىن، ءوز مۇددەلەرى مەن قوجايىندارىنىڭ سۇرانىستارىنا وزگەرىستەر ەنگىزۋدى قالايتىن كۇشتەر كىرىستى. مەن قازاقستان باسشىلىعى مەن ۇ ق ش ۇ ەلدەرى باسشىلىعىنىڭ كۇش-جىگەرى ارقىلى وسى جاعدايدىڭ ورشۋىنە جول بەرمەگەنىمىزگە قۋانىشتىمىن»، - دەدى ول.
