ماس كۇيىندە رۋلگە وتىرعان اقتوبەلىك ەكس-دەپۋتات ءۇشىنشى رەت سوت وتىرىسىنا كەلمەي قالدى
اقتوبە قالالىق ءماسليحاتىنىڭ بۇرىنعى دەپۋتاتى سانيا مۇراتوۆا رۋلگە ماس كۇيىندە وتىرعانى ءۇشىن بۇگىن سوت الدىندا جاۋاپ بەرۋى ءتيىس ەدى.
كۇشتەپ اكەلۋ ۇيعارىمى شىعارىلعانىمەن، پوليتسيا ورىنداي المادى، دەپ حابارلايدى Kazinform.
قالا ءماسليحاتىنىڭ دەپۋتاتى بولعان ءسانيا مۇراتوۆاعا قاتىستى اكىمشىلىك قۇقىقبۇزۋشىلىق تۋرالى كودەكستىڭ «كولىك قۇرالىن جولدىڭ ءجۇرۋ بولىگىندە ورنالاستىرۋ، قارسى ءجۇرىپ ءوتۋ نەمەسە باسىپ وزۋ قاعيدالارىن بۇزۋ» (596-باپ) جانە «جۇرگىزۋشىنىڭ كولىك قۇرالىن الكوگولدىك، ەسىرتكىلىك جانە (نەمەسە) ۋىتقۇمارلىق ماساڭ كۇيدە باسقارۋى، سول سياقتى كولىك قۇرالىن الكوگولدىك، ەسىرتكىلىك جانە (نەمەسە) ۋىتقۇمارلىق ماساڭ كۇيدەگى ادامنىڭ باسقارۋىنا بەرۋ» (608-باپ) باپتارى بويىنشا حاتتامالار تولتىرىلعان بولاتىن. وتكەن ايدا ا ق ب ت ك «كولىك قۇرالىن جولدىڭ ءجۇرۋ بولىگىندە ورنالاستىرۋ، قارسى ءجۇرىپ ءوتۋ نەمەسە باسىپ وزۋ قاعيدالارىن بۇزۋ» بابى بويىنشا سىرتتاي شەشىم شىعىپ، سۋديا ءسانيا مۇراتوۆانى 6 ايعا كولىك جۇرگىزۋ قۇقىعىنان ايىردى.
بۇگىن ماس كۇيىندە رۋلگە وتىرعانى ءۇشىن سوت الدىندا جاۋاپ بەرۋى ءتيىس ەدى. الايدا ول تاعى دا كەلمەي قالدى. ال حاتتاما تولتىرۋشى پوليتسيا قىزمەتكەرى نۇرجان مۇسىرەپوۆ سول كۇنى بولعان وقيعانى باياندادى.
«اقتوبە قالاسى بايىشيەۆ كوشەسىندە ورنالاسقان التاير دۇكەنىنىڭ الدىندا كولىك قۇرالىن توقتاتىپ، تەكسەرۋ بارىسىندا جۇرگىزۋشىدەن ءيىس سەزىلدى. جۇرگىزۋشىنى مەديتسينالىق ساراپتاما ورتالىعىندا اپارعان ۋاقىتتا جەڭىل دارەجەدەگى ماساڭدىق بايقالدى. سانيا مۇراتوۆاعا ا ق ب ت ك- ءنىڭ 608-بابى 1-تارماعى بويىنشا اكىمشىلىك حاتتاما تولتىرىلدى. جۇرگىزۋشى اكىمشىلىك حاتتامامەن كەلىسەتىنىن راستادى»، - دەدى حاتتاما تولتىرۋشى پوليتسيا قىزمەتكەرى نۇرجان مۇسىرەپوۆ.
سۋديا قايىرجان الاش ۇلى سوت وتىرىسى كەزىندە «كۇشتەپ اكەلۋ» ۇيقارىمىنىڭ نەلىكتەن ورىندالماعانىن سۇرادى. الايدا پوليتسيا قىزمەتكەرى نۇرجان مۇسىرەپوۆ وبلىس بويىنشا بارىنە حابار بەرىلگەنىن عانا ايتتى.
«ماجبۇرلەپ اكەلۋ ۇيعارىمى ورىندالعان جوق. سول سەبەپتەن سوت ءىستى قاراۋدى 26-قازان كۇنى ساعات 11:00 گە كەيىنگە قالدىرۋ كەرەك دەپ ەسەپتەيدى. تاعى دا وبلىستىق پوليتسيا دەپارتامەنتىنە ۇيعارىم جىبەرەمىز. كەلمەگەن جاعدايدا ق ر ا ق ب ت ك- ءتىڭ 744-بابىنا سايكەس حاتتاما تولتىرىلعان ازاماتشاسىز قارايمىز»، - دەدى سۋديا قايىرجان الاش ۇلى.
ەسكە سالساق، قالا ءماسليحاتىنىڭ دەپۋتاتى ءسانيا مۇراتوۆا ماس كۇيدە كولىك جۇرگىزگەنى ءۇشىن ۇستالعان بولاتىن.
كەيىن ول دەپۋتاتتىق مانداتىنان ءوز ەركىمەن باس تارتتى.
