مارال يشاننىڭ كەنەسارىعا سىيلاعان قۇران كىتابى تۇركىستانعا جەتكىزىلدى
مارال يشاننىڭ كەنەسارىعا سىيلاعان قۇران كىتابى تۇركىستانعا جەتكىزىلدى، دەپ حابارلايدى Kazinform.
ق ر پرەزيدەنتى قاسىم- جومارت توقايەۆ كيەلى تۇركىستاندا ۇلتتىق قۇرىلتايدىڭ «ادىلەتتى قازاقستان - ادال ازامات» اتتى ەكىنشى وتىرىسىندا ايگىلى مارال يشاننىڭ كەنەسارى حانعا سىيلاعان قۇران كىتابىن قوجا احمەت ياساۋي كەسەنەسىنە قويۋدى ۇسىنعان ەدى. وسى ورايدا بۇگىن اتالعان قۇران كىتابىن قوجا احمەت ياساۋي كەسەنەسىنە تاپسىرۋ ءىس- شاراسى ءوتتى.
سالتاناتتى شاراعا تۇركىستان وبلىسىنىڭ اكىمى دارحان ساتىبالدى، قازاقستان مۇسىلماندارى ءدىني باسقارماسىنىڭ ءتوراعاسى، باس مۇفتي ناۋرىزباي قاجى تاعان ۇلى، كەنەسارى حاننىڭ ۇرپاقتارى قاتىستى.
« قازاقتىڭ 21 حانى، سۇلتاندارى مەن باتىرلارى جەرلەنگەن قوجا احمەت ياساۋي كەسەنەسىنە وسىنداي سيرەك جادىگەردى اكەلۋ - ءبىز ءۇشىن ۇلكەن مارتەبە، ماقتانىش. بۇل - ەلىمىزدىڭ رۋحىن كوتەرەتىن وقيعا ەكەندىگى انىق. قالامىزعا كەلگەن تۋريستەر ءۇشىن تايقازانمەن قاتار تاعى دا ءبىر ەلىمىزدىڭ ماڭىزدى، سيرەك جادىگەرىنىڭ بولۋى وتە قۋانىشتى جاعداي. قوجا احمەت ياساۋيدەن باستاۋ الاتىن قازاق جەرىندەگى رۋحاني ساباقتاستىققازىرگە دەيىن ۇزدىكسىز جالعاسىپ كەلەدى. ءبىز قوعامدا قالىپتاسقان ساياسي تۇراقتىلىقتى، ادامداردىڭ ءبىر- بىرىنە دەگەن مەيىرىمدىلىگىن ساقتاپ، كەلەر ۇرپاققا امانات ەتىپ قالدىرۋعا ءتيىسپىز. وسى كىتاپتى ەلىمىزگە قايتارۋ ءۇشىن ۇلەسىن قوسقان ۇلتتىڭ جاناشىر ازاماتتارىنا ءوز العىسىمدى ايتامىن»، - دەدى وبلىس اكىمى.
ناۋرىزباي قاجى تاعان ۇلى بابامىزدان جەتكەن قۇندى جادىگەردى قازاقستان مۇسىلماندارى ءدىني باسقارماسى وسى جىلدىڭ ماۋسىم ايىندا قابىلداپ العانىن، مارال يشاننىڭ تەك ءدىندار عانا ەمەس، قوعام قايراتكەرى ەكەنىنە، اتقارعان ۇلاعاتتى ىستەرىنە توقتالدى.
« قۇندى جادىگەردىڭ قوجا احمەت ياساۋي بابامىزدىڭ كەسەنەسىنە قويىلۋى ءداستۇرلى ءدىنىمىزدىڭ مارتەبەسىنىڭ ارتىپ، حالقىمىزدىڭ ساناسىنىڭ ىزگىلىككە وزگەرۋىنە ىقپال ەتەدى دەگەن ويدامىز. مارال يشان بابامىز كىم دەگەندە ءبىز ونى تەك ءدىندار عانا ەمەس، قوعام قايراتكەرى، ازاتتىق ءۇشىن كۇرەسكەن تۇلعا رەتىندە تانۋعا ءتيىسپىز. مارال يشاننىڭ اعارتۋشىلىق قىزمەتى ءبىر توبە. ءبىز دە بۇگىن قۇندى مۇرانى حاندار مەن بيلەر، سۇلتاندار مەن رۋحاني ۇستازداردىڭ قيامەتكە دەيىنگى ماڭگىلىك تۇراعى بولعان كيەلى مەكەنگە الىپ كەلدىك. الەمنىڭ ءار قيىرىنان تۇركىستانعا كەلەتىن كەز- كەلگەن ادام ءۇشىن بۇل تاعىلىمى مول، بەرەرى كوپ تاريحي دۇنيە»، - دەدى باس مۇفتي.
سونىمەن بىرگە قازاقستان رەسرۋبليكاسى مادەنيەت جانە اقپارات مينيسترلىگى ءدىن ىستەرى كوميتەتىنىڭ ءتوراعاسى ەرجان نۇكەجانوۆ تا بۇل جادىگەردىڭ ماڭىزىنا توقتالدى.
رۋحاني ءىس- شارادا عۇلاما قاريلار قۇران حاتىم ءتۇسىردى. باس مۇفتي قۇران كىتاپتى «ازىرەت سۇلتان» مەملەكەتتىك تاريحي- مادەني مۋزەي- قورىعىنىڭ ديرەكتورى ماۋلەن سادىقبەكوۆكە تاپسىرىپ، ول ۇلكەن اقساراي بولمەسىندەگى ارنايى دايىندالعان سورەگە ورناتىلدى. ەكى عاسىر بويى قولدان قولعا ءوتىپ، ەندى عانا تاريحي وتانىنا جەتكەن كيەلى كىتاپتا كەنەسارى حاننىڭ ءمورى بار.
