مامىر مەرەكەلەرىندە شومىلۋعا بارماعان ءجون - قۇتقارۋشى
الماتى. KAZINFORM - «قازگيدرومەت» ماماندارى مامىر ايىندا ەلىمىزدىڭ وڭتۇستىك وڭىرلەرىندە اۋا-رايىنىڭ ءبىرشاما جىلىناتىنىن بولجايدى.
كۇن جىلىنۋىمەن اي باسىنداعى مەرەكە كۇندەرىن پايدالانىپ تۇرعىندار ءارتۇرلى سۋ قويمالارىنا بارىپ شومىلۋى مۇمكىن. وسى ورايدا، الماتىداعى ق ر ت ج م رەسپۋبليكالىق جەدەل- قۇتقارۋ جاساعىنىڭ باس قۇتقارۋشىسى رينات فايزۋللين سۋ ماۋسىمى قاشان باستالاتىنى جانە قاۋىپسىزدىك ەرەجەلەرىن قالاي ساقتاۋ كەرەك ەكەنىن ايتىپ بەردى.
الماتىداعى رەسپۋبليكالىق جەدەل-قۇتقارۋ جاساعىنىڭ باس قۇتقارۋشىسى ءوز تاجىريبەسىنە سۇيەنە وتىرىپ جابدىقتالماعان وزەن-كولدەردە شومىلماۋعا كەڭەس بەرەدى. رينات فايزۋلليننىڭ ايتۋىنشا، قازىر الماتى ماڭىنداعى سۋ قويمالارىنىڭ تەمپەراتۋراسى سۋعا تۇسەتىن قاجەتتى دەڭگەيدە قىزىپ ۇلگەرمەگەن.
«مامىر ايىنىڭ باسىنداعى مەرەكە جانە دەمالىس كۇندەرى شومىلۋعا بارماعان دۇرىس. ويتكەنى وزەن- كولدەردەگى سۋ ءالى قىزىعان جوق. جالپى سۋ تەمپەراتۋراسى 18 °C گرادۋستان تومەن بولمايتىن جابدىقتالعان سۋ قويمالارىندا شومىلعان ءجون. قازىر سۋ تەمپەراتۋراسى نەبارى 7-8 °C گرادۋس بولىپ تۇر. سونداي- اق الماتى ماڭىنداعى «اۋەجاي كولى» سەكىلدى جابايى سۋ قويمالارىندا شومىلۋعا تىيىم سالىنادى. ونىڭ بىرنەشە سەبەپتەرى بار. ءبىرىنشىسى، سۋ قويماسىنىڭ جاعالاۋىندا نە سۋ استىندا ادام دەنساۋلىعىنا زيان كەلتىرەتىن قاۋىپتى زاتتار بولۋى مۇمكىن. ەكىنشىدەن، «اۋەجاي كولىنە» كىشى الماتى وزەنىنىنەن قۇيىلاتىن قاۋىپتى كومپونەنتتەردىڭ دەڭگەيى جوعارى بولۋى بايلانىستى مۇندا الماتى قالاسىنىڭ سانيتاريالىق- ەپيدەميولوگيالىق باقىلاۋ دەپارتامەنتى شەشىمى بويىنشا شومىلۋعا رۇقسات ەتىلمەيدى»، - دەدى قۇتقارۋشى.
ول سونداي-اق شومىلۋ كەزىندە قاۋىپسىزدىك ەرەجەلەرىن قاتاڭ ساقتاپ، الكوگولدىك ىشىمدىكتەردى قولدانباۋ قاجەتتىگىن اتاپ ءوتتى.
«سۋعا ءتۇسۋ كەزىندەگى قاۋىپسىزدىك ەرەجەلەرى مەن تالاپتارىنا كەلسەك، الكوگولدىك ىشىمدىكتەردى قابىلداپ، ماس كۇيدە شومىلۋعا بولمايدى. وعان قوسا، وزىڭە تانىس ەمەس سۋ قويماسىندا بەلدەن تومەن جەرگە بارۋدىڭ قاجەتى جوق. اسىرەسە، بالالار مەن جۇزە المايتىن ادامدار اباي بولۋى قاجەت. ەگەر ءبىر توپ ادام شومىلۋعا كەلسە، ولاردىڭ ءبىر-ءبىرىن باقىلاپ، كوزدەن جوعالتپاعانى ءجون. جۇزە المايتىن ازاماتتىڭ ۇرلەنگەن ماتراس نە شەڭبەردى قولدانۋىنا كەڭەس بەرىلمەيدى. ولار تەز جارىلاتىندىقتان، ادام قاۋىپتى جاعدايدا قالىپ قويۋى مۇمكىن. تاعى ءبىر ەسكەرەتىنى، قاپشاعاي سىندى سۋ قويمالارىندا كاتەر، قايىقتارعا جاقىن جۇزۋگە جانە قايىق، كوپىر سىندى جەرلەردەن سەكىرۋگە بولمايدى»، - دەدى رينات فايزۋللين.
رينات رۋستام ۇلىنىڭ ايتۋىنشا، سۋدا ۇزاق ءجۇزۋ دە ادام ومىرىنە قاۋىپتى. ادام ءوز كۇشىن ەسكەرمەي، سالقىن سۋدا ۇزاق بولۋى دەنە تەمپەراتۋراسىنىڭ تومەندەۋىنە، سونداي- اق اياق-قولداردىڭ تارتىلۋىنا اكەلەدى.
«سۋدا ۇزاق بولماۋعا دا كەڭەس بەرىلەدى، ويتكەنى گيپوتەرميا (دەنە تەمپەراتۋراسىنىڭ تومەندەۋى) ورىن الۋى مۇمكىن. گيپوتەرميا كوبىنەسە اياق- قولداردىڭ ۇستاماسىنا الىپ كەلەدى. ۇستاما ورىن السا، ادام ارقاسىنا جاتىپ، جاعالاۋعا قاراي ءجۇزۋى نە ينە/تۇيرەگىشتى ۇستاما بولعان دەنە بولىگىنە ەنگىزۋى، ول بولماعان جاعدايعا اياق ۇشىن وزىنە قاراي تارتۋى قاجەت»، - دەدى رەسپۋبليكالىق جەدەل- قۇتقارۋ جاساعىنىڭ باس قۇتقارۋشىسى.
