ماماندار ەلدەگى اسفالتبەتون زاۋىتتارىن تەكسەرۋگە كىرىستى
استانا. KAZINFORM - قازاقستان جول عىلىمي-زەرتتەۋ ينستيتۋتىنىڭ ماماندارى قازاقستانداعى اسفالتبەتون زاۋىتتارىن تەكسەرۋگە كىرىستى، دەپ حابارلايدى ق ر كولىك مينسترلىگىنىڭ باسپا ءسوز قىزمەتى.
باسپا ءسوز قىزمەتىنىڭ حابارلاۋىنشا، زاۋىتتاردىڭ جاڭا قۇرىلىس ماۋسىمىنا جانە اسفالتبەتون قوسپالارىن ساپالى وندىرۋگە دايىندىعى تەكسەرىلەدى، سونداي-اق جول-قۇرىلىس ماتەريالدارىن سىنايتىن زەرتحانالارعا باقىلاۋ جۇرگىزىلەدى.
قازىرگى ۋاقىتتا عىلىمي-زەرتتەۋ ينستيتۋتىنىڭ ساراپشىلارى مەن عالىمدارىنان قۇرالعان كوميسسيا جول اكتيۆتەرىنىڭ ۇلتتىق ساپا ورتالىعىمەن بىرلەسىپ جامبىل وبلىسىنداعى اسفالتبەتون زاۋىتتارىنا زەرتتەۋ جۇرگىزىپ جاتىر.
قازاقستاندا جالپى 300 دەن استام اسفالتبەتون زاۋىتى جۇمىس ىستەپ تۇر. وتاندىق جول عىلىمي-زەرتتەۋ ينستيتۋتىنىڭ ماماندارى ساپا ستاندارتتارى مەن نورماتيۆتەرگە سايكەستىگىن تەكسەرۋ ماقساتىندا ءاربىر زاۋىتقا ينسپەكسيا جۇرگىزۋدى جوسپارلاپ وتىر.
تەكسەرۋ جۇمىستارىنىڭ ناتيجەلەرى ق ر كولىك مينيسترلىگى اۆتوموبيل جولدارى كوميتەتىنىڭ قولداۋىمەن قۇرىلعان rcmbase.kz جول-قۇرىلىس ماتەريالدارىنىڭ ءبىرىڭعاي بازاسىندا قولجەتىمدى بولادى. اتالعان بازادا زاۋىتتىڭ ورنالاسقان ورنى، تەحنيكالىق سيپاتتامالارى، جوبالارعا قاتىسۋى، زەرتحانالاردىڭ بولۋى، سالماق ۇلەستىرگىشتەرىنىڭ جاي-كۇيى جانە اسفالتبەتون زاۋىتتارىنىڭ ەكولوگيالىق قاۋىپسىزدىگى جونىندەگى شارالاردىڭ ساقتالۋى تۋرالى دەرەكتەر ۇسىنىلادى.
ەستەرىڭىزگە سالا كەتەيىك، جول-قۇرىلىس ماتەريالدارىنىڭ ءبىرىڭعاي بازاسىن قۇرۋ جول-قۇرىلىس ماتەريالدارىنىڭ ساپاسىن ارتتىرۋعا، جەتكىزۋشىلەردى تاڭداۋ كەزىندە اشىقتىقتى قامتاماسىز ەتۋگە جانە جول قۇرىلىسىندا ماتەريالدار مەن تەحنولوگيالاردى پايدالانۋدى جۇيەلەۋگە ارنالعان.
