ماۋلەن اشىمبايەۆ قىتايمەن ۆيزاسىز رەجيم ەلىمىزگە قالاي اسەر ەتەتىنىن ايتتى

«جالپى، ەلىمىزدىڭ ءبىراز كاسىپكەرى قىتايعا ءجيى ساپارلايدى. شىعىن جانە ورتا، ءىرى بيزنەس ىسكەرلىك قارىم- قاتىناستارىن نىعايتىپ جاتىر. اسىرەسە، شاعىن بيزنەسپەن اينالىساتىندار ءۇشىن قىتايعا ساپارلاۋ، سەرىكتەستەرىمەن جۇمىس ىستەۋ، ءتيىستى شارتتاردى بەكىتۋ، جۇكتەردى شىعارۋ باعىتىندا جۇمىستارى جەڭىلدەيدى. وسىعان دەيىن قىتايمەن ارادا ىسكەرلىك بايلانىستارى بار ادامدار وسى ماسەلەنى ءجيى كوتەرگەن بولاتىن. ەندى ولارعا ءتيىستى جاعداي جاسالىپ وتىر»، - دەدى م. اشىمبايەۆ سەناتتا تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، ەلىمىزدە كوپتەگەن ادام قىتايداعى تۋىستارىنا، ياعني قانداستارىمىزعا، سونداي- اق وسى ەلدە وقۋدا جۇرگەن بالالارىنا بارعىسى كەلەدى.

«قىتايداعى تاريحي جەرلەرگە بارعىسى كەلەتىن تۋريستەر دە بارشىلىق. سوندىقتان ءبىزدىڭ ازاماتتار ءۇشىن جاعداي جاسالىپ وتىر. ەندى ۆيزانى كۇتىپ جۇرمەي، ەشبىر قوسىمشا رۇقسات قۇجاتتارسىز كورشى ەلگە ساپارلاي الادى. ەكى ەل اراسىندا بەكىتىلگەن كەلىسىم قازاقستان ازاماتتارىنا ەش كەدەرگىسىز قىتايعا بارۋىنا مۇمكىندىك اشادى. قازاقستان بەكىتكەن كەز كەلگەن كەلىسىم ەلىمىزدىڭ ۇلتتىق مۇددەسىنە ساي كەلەدى. بۇل رەتتە، بيزنەستى دامىتۋعا جانە قاراپايىم ادامدارعا وڭ ناتيجەسى بولادى دەپ سانايمىن»، - دەدى سەنات ءتوراعاسى.

ايتا كەتەيىك، بيىل 10-قاراشادا قازاقستان مەن قىتاي حالىق رەسپۋبليكاسىنىڭ ۇكىمەتى اراسىنداعى ۆيزالىق تالاپتاردان ءوزارا بوساتۋ تۋرالى كەلىسىم كۇشىنە ەندى.

سىرتقى ىستەر مينيسترلىگى باسپا ءسوز قىزمەتىنىڭ مالىمەتىنشە، وسى كەلىسىمنىڭ 1- بابىنا سايكەس ەكى ەلدىڭ ازاماتتارى جەكە ىستەردى، ءتۋريزمدى، ەم قابىلداۋدى، حالىقارالىق تاسىمالداردى، ترانزيتتىك، سونداي- اق ىسكەرلىك ماقساتتاردى جۇزەگە اسىرۋ ءۇشىن ۆيزالىق تالاپتاردان بوساتىلادى. وسى رەتتە ازاماتتاردىڭ ەكى مەملەكەت اۋماعىندا بولۋ مەرزىمى كۇنتىزبەلىك 30 (وتىز) كۇننەن اسپايتىن مەرزىمدەگى كەزەڭگە، ال كۇنتىزبەلىك 180 ء(جۇز سەكسەن) كۇن ىشىندە جيىنتىعىندا كۇنتىزبەلىك 90 (توقسان) كۇننەن اسپاۋى قاجەت.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى