ماۋلەن اشىمبايەۆ جاڭا ەكونوميكالىق ۇلگىگە كوشۋدىڭ نەگىزگى 4 شارتىن اتادى
سەنات سپيكەرى ماۋلەن اشىمبايەۆ مەملەكەت باسشىسىنىڭ جولداۋىنداعى ەكونوميكالىق باسىمدىق تۋرالى بايانداپ، جاڭا ەكونوميكالىق مودەلگە كوشۋدىڭ 4 نەگىزگى شارتىن اتاپ ءوتتى، دەپ حابارلايدى قازاقپارات.
پالاتا ءتوراعاسىنىڭ ايتۋىنشا، 2023-جىلعى جولداۋدىڭ ەكونوميكالىق باسىمدىعى ەلىمىزدىڭ تەڭگەرىمدى دامۋى ءۇشىن ماڭىزدى. ەگەر بۇرىن ساياسي رەفورمالارعا باسا نازار اۋدارىلسا، قازىر قالىپتاسقان ساياساتتى ەكونوميكالىق شارالارمەن تەڭەستىرگەن ءجون.
«وتكەن جىلدارى، اسىرەسە قاڭتار وقيعاسىنان كەيىن ساياسي جۇيەنى رەفورمالاۋ بويىنشا جۇيەلى شارالار قابىلداۋ وتە ماڭىزدى بولدى. قازىر جالپى العاندا، ساياسي سالادا بەلگىلى ءبىر ىلگەرىلەۋشىلىككە قول جەتكىزىلدى دەپ ايتا الامىز. ەندى بىزگە ەكونوميكالىق باعىتتى جەتىلدىرۋ قاجەت. ەكونوميكامىزدا قوردالانىپ قالعان ماسەلەلەردى شەشۋدىڭ ماڭىزى زور. وسىعان بايلانىستى بيىلعى جولداۋدا جاڭا ەكونوميكالىق مودەلدىڭ ماقسات-مىندەتتەرى ايقىندالىپ، وعان قول جەتكىزۋدىڭ ماڭىزدى تەتىكتەرى كورسەتىلگەن»، - دەدى ماۋلەن اشىمبايەۆ BaitassovLive YouTube ارناسىنا بەرگەن سۇحباتىندا.
سەنات ءتوراعاسىنىڭ ايتۋىنشا، العا قويىلعان ماقساتتارعا قول جەتكىزۋ ءۇشىن ءتورت شارت ورىندالۋى كەرەك. ولار ەكونوميكانىڭ دامۋىنا قاجەتتى سەرپىن بەرىپ، جىل سايىن 6-7 پايىزدىق ءوسۋدى قامتاماسىز ەتەدى.
«ءبىرىنشى شارت - ەكونوميكانىڭ بارلىق سۋبەكتىسىنىڭ، ەڭ الدىمەن، كاسىپكەرلەردىڭ، مەملەكەتتىك ورگانداردىڭ، قۇقىق قورعاۋ ورگاندارىنىڭ ناقتى، تۇسىنىكتى، اشىق، ءادىل جانە ۇزاقمەرزىمدى «ويىن ەرەجەلەرىن» قابىلداۋ. ەكىنشى شارت - ينفراقۇرىلىمدى دامىتۋ جانە كاسىپورىندارىمىزدى شيكىزاتپەن قامتاماسىز ەتۋ. ۇشىنشىدەن - بيزنەستى نەسيەلەرمەن جانە ينۆەستيتسيامەن قامتاماسىز ەتۋ. ەندى ەكونوميكامىزدى دامىتۋ ءۇشىن بانكتەردىڭ قىزمەتىن جانداندىرۋعا قاجەتتى قانداي زاڭداردى وزگەرتۋ كەرەك ەكەنىن قاراستىرامىز. ءتورتىنشى شارت - ىشكى نارىقتى جۇيەلى تۇردە قورعاۋ. ءيا، ءبىز ەۋرازيالىق ەكونوميكالىق وداقتىڭ جانە دۇنيەجۇزىلىك ساۋدا ۇيىمىنىڭ مۇشەلەرىمىز. الايدا د س ۇ اياسىندا دا كاسىپكەرلەرىمىزدى قورعاۋدىڭ بارلىق زاڭدى قۇرالىن قولدانىپ جاتقان جوقپىز»، - دەدى سەنات سپيكەرى.
