ماۋلەن اشىمبايەۆ الەمدىك رۋحاني ليدەرلەر باس قوسقان حالىقارالىق كونفەرەنسيادا ءسوز سويلەدى
قازاقستان رەسپۋبليكاسى پارلامەنتى سەناتىنىڭ ءتوراعاسى ماۋلەن اشىمبايەۆ «سەنىمدەردىڭ توعىسۋى: رۋحاني ليدەرلەردىڭ جاھاندىق جاڭعىرۋ جولىندا بىرىگۋى» اتتى حالىقارالىق كونفەرەنسيادا ءسوز سويلەدى.
Kazіnform وقىرمان نازارىنا سپيكەر ءسوزىنىڭ ءماتىنىن ۇسىنادى.
قازاقستان رەسپۋبليكاسى پارلامەنتى سەناتىنىڭ ءتوراعاسى ماۋلەن اشىمبايەۆتىڭ «سەنىمدەردىڭ توعىسۋى: رۋحاني ليدەرلەردىڭ جاھاندىق جاڭعىرۋ جولىندا بىرىگۋى» اتتى حالىقارالىق كونفەرەنسياسىندا سويلەگەن ءسوزى.
پلانەتارلىق جاڭعىرۋ جولىنداعى رۋحاني كوشباسشىلاردى بىرىكتىرۋگە ارنالعان كونفەرەنسيانىڭ ابۋ-دابيدە ءوتۋىنىڭ سيمۆولدىق ءمانى بار. بۇل قالا - جاھاندىق ءدىنارالىق ديالوگتىڭ تانىمال ورتالىقتارىنىڭ ءبىرى. مۇندا اشىلعان اۆراام اۋلەتىنىڭ ءۇيى ءۇش ءدىننىڭ - يسلام، يۋدايزم جانە حريستيان ءدىنىنىڭ باۋىرلاستىق جاقىندىعىن ەسكە سالادى.
«تاياۋ شىعىس پەن باسقا ايماقتاردا قاقتىعىستار ءورشىپ تۇرعان قازىرگى ۋاقىتتا رۋحاني كوشباسشىلاردىڭ كەزدەسۋى - ءوزارا تۇسىنىستىك پەن قۇرمەتكە نەگىزدەلگەن حالىقارالىق ديالوگ مادەنيەتىن ىلگەرىلەتۋگە ماڭىزدى ۇلەس قوسادى».
ءبىز الداعى ۋاقىتتا وتەتىن COP28 كليماتتىق كونفەرەنسياسىنا دايىندىق بارىسىندا جينالىپ وتىرمىز. قازاقستان بىرىككەن اراب امىرلىكتەرىنىڭ كليماتتىق كۇن ءتارتىبىن تالقىلاۋعا الەمدىك دىندەر كوشباسشىلارىن تارتۋ تۋرالى باستاماسىن تولىعىمەن قولدايدى.
بۇل ءتاسىل وڭ ناتيجە بەرەدى دەپ ەسەپتەيمىز، ويتكەنى بۇگىنگى تاڭدا رۋحاني كوشباسشىلاردىڭ سىندارلى جانە جاسامپاز ءرولى ماڭىزدى.
كونفەرەنسيادا تالقىلاناتىن تاقىرىپ بۇكىل الەم ءۇشىن وتە وزەكتى. قازاقستان كليماتتىڭ وزگەرۋىنە دەن قويۋ بويىنشا حالىقارالىق ىستەرگە ەلەۋلى ۇلەس قوسىپ وتىرعانىن اتاپ وتكىم كەلەدى.
ءبىزدىڭ ەلىمىز پاريج كەلىسىمىن العاشقىلاردىڭ ءبىرى بولىپ راتيفيكاتسيالادى. ءبىز كومىرتەگى ءىزىن ازايتۋعا جانە 2060-جىلعا قاراي كومىرتەگىن بەيتاراپتاندىرۋعا قول جەتكىزۋگە باعىتتالعان ساياساتتى بىرتىندەپ جۇزەگە اسىرۋدامىز.
ورتالىق ازيا كليماتتىق قيىندىقتاردى جەڭۋ ءۇشىن حالىقارالىق ىنتىماقتاستىقتىڭ ماڭىزدىلىعىن جاقسى تۇسىنەدى. ءبىزدىڭ ءوڭىر جاھاندىق جىلىنۋدىڭ سالدارىن باستان كەشىرۋدە. ساراپشىلاردىڭ مالىمەتىنشە، ورتالىق ازياداعى تەمپەراتۋرا الەمدىك ورتاشا دەڭگەيدەن الدەقايدا جىلدام كوتەرىلۋدە.
وسىعان بايلانىستى قازاقستان پرەزيدەنتى قاسىم-جومارت كەمەل ۇلى توقايەۆ ب ۇ ۇ باس اسسامبلەياسىنىڭ 78-سەسسياسىندا وسى سالاداعى ناقتى باستامالاردى ۇسىندى. ونىڭ ىشىندە الماتى قالاسىندا ب ۇ ۇ- نىڭ كليماتتىڭ وزگەرۋى جانە جاسىل ەنەرگەتيكا بويىنشا ايماقتىق كەڭسەسىن اشۋ ۇسىنىسى دا بار.
ءبىزدىڭ ەلىمىز كليمات ماسەلەسى بويىنشا بارلىق مۇددەلى تاراپتارمەن ىنتىماقتاستىقتى دامىتۋعا دايىن.
وتكەن جىلى قازاقستان پرەزيدەنتى قاسىم-جومارت كەمەل ۇلى توقايەۆ ءتوراعالىق ەتكەن VII سەزد جوعارى مازمۇندى دەڭگەيدە ءوتتى. وعان 50 ەلدەن 100 دەن استام دەلەگاتسيا قاتىستى.
ولاردىڭ قاتارىندا ريم پاپاسى فرانتسيسك پەن ءال-ازحاردىڭ جوعارى يمامى احمەد شەيح ات-تايەب، سونداي-اق باسقا دىندەردىڭ جوعارى وكىلدەرى بولدى.
VII سەزدىڭ قورىتىندىسى بويىنشا وعان قاتىسۋشىلار استانا ءدىنارالىق فورۋمىن ودان ءارى دامىتۋ قاجەتتىگى تۋرالى شەشىم قابىلدادى.
سەز حاتشىلىعىنىڭ قازان ايىندا وتكەن وتىرىسىندا فورۋمدى 2033-جىلعا دەيىن دامىتۋ تۇجىرىمداماسى قابىلداندى. بۇل قۇجات سەز ميسسياسىن كەڭەيتۋدى كوزدەيدى.
2003-2023-جىلدار ارالىعىنداعى ءبىرىنشى كەزەڭدە سەزدىڭ نەگىزگى ماقساتى ءدىنارالىق ديالوگتى نىعايتۋ بولدى.
الداعى جىلدارى ءبىز الدىمىزعا جاڭا ماقسات قويىپ وتىرمىز، ول - ءدىن كوشباسشىلارىنا جاردەمدەسۋ جانە ەڭ وزەكتى جاھاندىق پروبلەمالاردى شەشۋ ءۇشىن رۋحاني ديپلوماتيانىڭ جاسامپاز الەۋەتىن ىسكە اسىرۋ.
الەمدىك رۋحاني كوشباسشىلار بىرىگىپ، ادامزات الدىندا تۇرعان ەكزيستەنتسيالدى قاتەرلەردى شەشۋگە ەلەۋلى ۇلەس قوسا الادى. ولاردىڭ قاتارىندا كليماتتىق قيىندىقتاردى، كەدەيشىلىك پەن تەڭسىزدىكتى جەڭۋ، ەكسترەميزممەن كۇرەسۋ، قاقتىعىستاردى توقتاتۋ بار. بۇل باعىتتا ءبىرقاتار ناقتى تەتىكتەر مەن باستامالار ۇسىنىلىپ وتىر.
الەمدىك جانە ءداستۇرلى ءدىن كوشباسشىلارى سەزىنىڭ جاڭارتىلعان ميسسياسى ءبىزدىڭ بۇگىنگى كونفەرەنسيامىزدىڭ يدەياسىنا تولىعىمەن سايكەس كەلەدى.
بۇگىنگى كونفەرەنتسيا جالپى سىن-قاتەرلەردى ەڭسەرۋ جانە بارلىق حالىقتاردىڭ يگىلىگى ءۇشىن شىنايى ىنتىماقتاستىق رۋحىن كوتەرەدى دەپ ويلايمىن.
مۇنداي كەزدەسۋلەر كونفەسسياارالىق ديالوگتى نىعايتىپ، قازىرگى پروبلەمالاردىڭ ءتيىمدى شەشىمدەرىن ىزدەۋگە ىقپال ەتەتىنىنە سەنىمدىمىن.
الەمدىك جانە ءداستۇرلى ءدىن ليدەرلەرى سەزىنىڭ حاتشىلىعى اتىنان قازاقستان ءارقاشان ىنتىماقتاستىققا اشىق جانە ورتاق ماقساتتار جولىندا بىرلەسىپ جۇمىس ىستەۋگە دايىن ەكەنىن تاعى ءبىر مارتە اتاپ وتكىم كەلەدى.
