ماۋلەن اشىمبايەۆ ا ق ش كونگرەسىنىڭ سەناتورىمەن ءبىرقاتار ماسەلەنى تالقىلادى
استانا. KAZINFORM - پارلامەنت سەناتىنىڭ ءتوراعاسى ماۋلەن اشىمبايەۆ ا ق ش كونگرەسىنىڭ سەناتورى ستيۆ دەينسپەن كەزدەستى.
وندا تاراپتار ەكىجاقتى پارلامەنتارالىق ىنتىماقتاستىقتى ودان ءارى نىعايتۋ ماسەلەلەرىن تالقىلادى.
سەناتتىڭ باسپا ءسوز قىزمەتىنىڭ مالىمەتىنشە، سۇحبات بارىسىندا قازاقستان- ا ق ش قارىم-قاتىناسىن دامىتۋدا جوعارى دەڭگەيدەگى مەملەكەتارالىق تۇراقتى ساياسي ديالوگتىڭ ىقپالى زور ەكەنى ايتىلدى. بىلتىر قىركۇيەك ايىندا ەكى ەلدىڭ پرەزيدەنتتەرى قاسىم-جومارت توقايەۆ پەن دجو بايدەن نيۋ-يوركتەگى ب ۇ ۇ باس اسسامبلەياسى الاڭىندا وتكەن C5+1 ءسامميتى اياسىندا كەزدەسكەن ەدى. سونداي- اق وتكەن جىلدىڭ اقپانىندا ا ق ش- تىڭ مەملەكەتتىك حاتشىسى ەنتوني بلينكەن قازاقستانعا رەسمي ساپارمەن كەلگەنى بەلگىلى. كەزدەسۋدە كوپجاقتى جانە پارلامەنتارالىق بايلانىستى دامىتۋ ماسەلەلەرىنە دە باسا ءمان بەرىلدى.
«ەكى ەلدىڭ پرەزيدەنتتەرى ءوزارا قارىم-قاتىناسىمىزدىڭ ستراتەگيالىق باسىمدىقتارى مەن كۇن ءتارتىبىن بەلگىلەپ، قازاقستان-امەريكا بايلانىسىن ءارى قاراي دامىتۋ ءۇشىن ماڭىزدى قادامدار جاسادى. قازىرگى تاڭدا مەملەكەتتەرىمىز اراسىندا قارقىندى ساياسي ديالوگ قالىپتاسقان. ساۋدا-ەكونوميكالىق ءوزارا ءىس-قيمىل دا بەلسەندى دامىپ كەلەدى جانە اۋقىمدى شارتتىق-قۇقىقتىق بازا بار. ەلدەرىمىزدىڭ ليدەرلەرى بەلگىلەپ بەرگەن تىعىز ىنتىماقتاستىق باسقا سالالاردا، ونىڭ ىشىندە زاڭ شىعارۋشى ورگاندار اراسىندا دا جوعارى دەڭگەيدە قولداۋ تابۋعا ءتيىس»، - دەدى ماۋلەن اشىمبايەۆ.
سونىمەن قاتار سۇحباتتاسۋشىلار پارلامەنت دەپۋتاتتارىنىڭ ساۋدا-ەكونوميكالىق ىنتىماقتاستىق باعىتىنداعى بىرلەسكەن جۇمىسىن جانە باسقا دا ماسەلەلەردى تالقىلادى. سەنات سپيكەرى پارلامەنتتىڭ مەملەكەت باسشىسىنىڭ باستاماسىمەن قولعا الىنعان رەفورمالاردى زاڭنامالىق تۇرعىدان قامتاماسىز ەتۋ باعىتىنداعى جۇمىسىنا، سونداي-اق، الەمدىك جانە ءداستۇرلى دىندەر ليدەرلەرى سەزىنىڭ تۇجىرىمداماسىنىڭ ىسكە اسىرىلۋ بارىسىنا دا توقتالىپ ءوتتى.
ءوز كەزەگىندە ستيۆ دەينس قازاقستاندا جۇرگىزىلگەن كەشەندى جاڭعىرۋلاردى جوعارى باعالادى. سونداي-اق سەناتور ءبىزدىڭ ەلدە دەموكراتيانى دامىتۋعا، جاڭا ەكونوميكالىق ۇلگىگە كوشۋگە جانە رۋحاني ديپلوماتيانى وركەندەتۋگە ارنالعان شارالاردىڭ تيىمدىلىگىنە نازار اۋدارىپ، ءوزارا بىرلەسكەن جۇمىستى جانداندىرۋعا بەيىل ەكەنىن اتاپ ءوتتى.
