مال باسى مەن ەگىن شىعىمى تۋرالى ستاتيستيكا «نولدەن» باستاپ جۇرگىزىلەدى
استانا. KAZINFORM - ستراتەگيالىق جوسپارلاۋ جانە رەفورمالار اگەنتتىگى Kazinform ساۋالىنا جولداعان جاۋابىندا اۋىل شارۋاشىلىعىنداعى مال باسى مەن ەگىن شىعىمى تۋرالى رەسمي ستاتيستيكانىڭ ساپاسىز ەكەنىن مويىندادى.
«اعىمداعى ستاتيستيكا مەن ناقتى جاعداي اراسىنداعى سايكەسسىزدىكتەن كورىنەتىن بەلگىلى ءبىر پروبلەمالار بار. اتاپ ايتقاندا، رەسمي ستاتيستيكالىق اقپاراتتى قۇراستىرۋ ءۇشىن اكىمشىلىك دەرەكتەر قولدانىلاتىن سالالاردا سايكەسسىزدىكتەر بايقالادى. قازىرگى ۋاقىتتا، وكىنىشكە قاراي، ۆەدومستۆولاردىڭ اكىمشىلىك دەرەكتەرىنىڭ ساپاسىزدىعى ءجيى كەزدەسەدى. مىسالى، ەلەكتروندى شارۋاشىلىق ەسەبىنىڭ دەرەكتەرى مەن باقىلاۋ ءجۇرىسى اراسىنداعى ەلەۋلى سايكەسسىزدىكتەر اۋىل شارۋاشىلىعى ستاتيستيكاسىنداعى اكىمشىلىك دەرەكتەردىڭ ساپاسىنىڭ تومەندىگىن كورسەتەدى» دەپ جازىلعان جاۋاپتا.
وسى ولقىلىقتىڭ ورنىن تولتىرۋ ءۇشىن ۇكىمەت اكىمدىكتەرگە ءتيىستى دەرەكتەردى نولدەن باستاپ قالىپتاستىرۋدى تاپسىرعان.
«اۋىل شارۋاشىلىعى سالاسىنداعى ناقتى جاعدايدى انىقتاۋ ءۇشىن ۇكىمەت وبلىس اكىمدىكتەرىنە 2024 -جىلعى 1-قاڭتارداعى جاعداي بويىنشا اۋىل شارۋاشىلىعى جانۋارلارى مەن قۇستاردىڭ سانىن جانە 2024 -جىلعى 1-شىلدەدەگى جاعداي بويىنشا ەگىس القابى جانە اۋىل شارۋاشىلىعى داقىلدارىنىڭ جالپى ءتۇسىمى تۋرالى دەرەكتەرىن «نولدەن» ناقتىلاۋدى تاپسىردى. دەرەكتەردى ناقتىلاۋدىڭ ورىندالۋ ساپاسىن باعالاۋ ءۇشىن قۇرامىنا جەرگىلىكتى اتقارۋشى ورگاندار، اۋىل شارۋاشىلىعى جانە ۆەتەريناريالىق قىزمەت باسقارماسىنىڭ وكىلدەرى كىرگەن دەربەس جۇمىس توپتارى قۇرىلدى» دەلىنگەن مينيسترلىك جاۋابىندا.
