ماجىلىستە قازاقستان- قىتاي ىنتىماقتاستىعىن نىعايتۋ ماسەلەلەرى تالقىلاندى
ءماجىلىستىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ ءتورايىمى ايگۇل قۇسپان قىتاي حالىق رەسپۋبليكاسىنىڭ نينسيا- حۋەي اۆتونوميالىق اۋدانى حالىقتىق ساياسي كونسۋلتاتيۆتىك كەڭەسىنىڭ ءتوراعاسى چەن يۋڭمەن كەزدەسىپ، ەكىجاقتى ىنتىماقتاستىقتى دامىتۋ ماسەلەلەرىن تالقىلادى.
«قازاقستان- قىتاي» دوستىق توبىنىڭ جەتەكشىسى ايگۇل قۇسپان ءوز سوزىندە ءماجىلىستىڭ قىتايمەن دوستىق جانە ستراتەگيالىق ارىپتەستىكتى نىعايتۋعا ۇلكەن ءمان بەرەتىنىن اتاپ ءوتتى.
- مەملەكەتارالىق قاتىناستاردى دامىتۋدا ەكى ەل باسشىلارى قاسىم- جومارت توقايەۆ پەن شي جينپيڭنىڭ ديپلوماتياسى ەرەكشە ءرول اتقارادى. ولاردىڭ 2023 -جىلدىڭ مامىر- قازان ايلارىنداعى كەلىسسوزدەرى قازاقستان- قىتاي ىنتىماقتاستىعى «التىن 30 -جىلدىعىنىڭ» كەزەكتى داۋىرىنە جاڭا سەرپىن بەردى، - دەدى كوميتەت باسشىسى.
ايگۇل قۇسپان قىتاي قازاقستاننىڭ ەڭ ءىرى ساۋدا سەرىكتەستەرىنىڭ ءبىرى ەكەنىنە توقتالدى. بىلتىر ەكىجاقتى تاۋار اينالىمى 35 پايىزعا ارتىپ، رەكوردتىق كولەم - 24,2 ميلليارد دوللارعا جەتتى. بيىل 8 ايدا ءوزارا ساۋدا تاعى 23 پايىزعا ءوسىپ، 19 ميلليارد دوللاردى قۇرادى.
چەن يۋن استاناعا مەملەكەت باسشىلارىنىڭ ورتاق كەلىسىمى اياسىندا «ءبىر بەلدەۋ، ءبىر جولدى» بىرلەسىپ قۇرۋ جونىندەگى ماڭىزدى مىندەتتى جۇزەگە اسىرۋ ماقساتىمەن كەلگەنىن ايتتى. سوڭعى 10 جىلدا تاراپتار بۇل سالادا كوپتەگەن جۇمىس اتقاردى.
- مەنىڭ مىندەتىم دە نيڭشيا مەن قازاقستان اراسىنداعى ىنتىماقتاستىق پەن تاجىريبە الماسۋعا جاردەمدەسۋ. ءتوراعا شي جينپيڭنىڭ نيڭشيانىڭ قىتايدىڭ باتىسىنداعى قازىناسى ەكەنىن ايتتى. جەرىمىز پايدالى قازبالارعا باي. ءبىز قىتايدا كومىر قورى بويىنشا التىنشى، گيپس قورى بويىنشا ءبىرىنشى ورىندامىز، - دەدى چەن يۋڭ.
سونىمەن قاتار تاراپتار اۋىل شارۋاشىلىعى، مادەنيەت جانە ءبىلىم سالالارىنداعى پراكتيكالىق ىنتىماقتاستىقتى تەرەڭدەتۋ ماسەلەلەرىن تالقىلادى. پارلامەنتارالىق دوستىق توپتارى اياسىندا زاڭنامالىق سالادا تاجىريبە الماسۋدى جالعاستىرۋعا دايىن ەكەندىكتەرىن ايتتى. جيىنعا ءماجىلىس دەپۋتاتتارى اناس باققوجايەۆ پەن اينا ءمۇسىرالىموۆا دا قاتىستى.
