ماجىلىستە بالا كۇتىمىنە بايلانىستى تولەنەتىن جاردەماقى مەرزىمىن 3 جىلعا ۇزارتۋ ۇسىنىلدى
ءماجىلىس دەپۋتاتى قايرات بالابيەۆ بالا كۇتىمىنە بايلانىستى تولەنەتىن جاردەماقى مەرزىمىن 3 جىلعا ۇزارتۋدى ۇسىندى، دەپ حابارلايدى Kazinform اگەنتتىگى.
«AMANAT» پارتياسى تولىق ەمەس وتباسىلاردىڭ، اسىراۋشىسىنان ايىرىلعان وتباسىلاردىڭ جانە جالعىزباستى انالاردىڭ، جالعىزباستى اكەلەردىڭ الەۋمەتتىك جاعدايىن قولداۋ، ول وتباسىلارىنداعى بالالاردىڭ قالىپتاسىپ، دامۋى تۋرالى جۇيەلى شارالاردى جۇزەگە اسىرۋعا بايلانىستى كەلەسى ۇسىنىستاردى ەنگىزەدى.
«1. قازاقستانداعى بارلىق ايەل مەن جالعىزباستى اكەلەرگە بالا كۇتىمىنە بايلانىستى تولەنەتىن جاردەماقى مەرزىمىن 3 جىلعا دەيىن ۇزارتۋدى ۇسىنامىز. 2. جۇمىسسىز جالعىزباستى انالار جانە جالعىزباستى اكەلەردىڭ بالا كۇتىمىنە بايلانىستى اي سايىنعى الەۋمەتتىك تولەم مولشەرىن زاڭدا بەكىتىلگەن كۇنكورىس مينيمۋمىنا تەڭەستىرۋدى سۇرايمىز»، - دەدى دەپۋتات.
سونداي-اق، ول اتالعان ساناتتاعى ازاماتتاردىڭ بالاباقشا كەزەگىنە تۇرۋى دا قيىن ەكەنىن اتاپ ءوتتى.
«جالعىزباستى انالار جانە جالعىزباستى اكەلەردىڭ بالالارىنا مەملەكەتتىك بالاباقشادان ورىن الۋ ءۇشىن كەزەكتە باسىمدىق بەرۋدى، مەكتەپتەردە سپورت سەكتسيالارىنا جانە شىعارماشىلىق ۇيىرمەلەرگە تەگىن قاتىسۋىن قامتاماسىز ەتۋدى، ەڭبەك نارىعىنداعى سۇرانىسقا يە ماماندىقتارعا كاسىبي باعدار جۇمىسىنىڭ باعدارلاماسىن قابىلداپ، گرانت نەگىزىندە ءبىلىم الىپ، ەڭبەككە ارالاسۋىن قاراستىراتىن باعدارلاما قابىلداۋدى سۇرايمىز»، - دەدى قايرات بالابييەۆ.
