ماجارستاندا «قازاقستاننىڭ كوشپەندىلەرى» اتتى كورمەنى 12 مىڭ ادام تاماشالادى
الماتى. KAZINFORM - ماجارستاننىڭ «كارچاگ كينچە» ونەر مۋزەيىندە «قازاقستاننىڭ كوشپەندىلەرى: وتكەنى مەن بۇگىنى» اتتى كورمە اياقتالدى.
ەكسپوزيتسياعا قازاق حالقىنىڭ باي تاريحي جانە مادەني مۇراسىن كورسەتەتىن 200 دەن استام بىرەگەي جادىگەر قويىلعان.
كورمەگە كەلۋشىلەرگە ۇرپاقتار ساباقتاستىعىنىڭ سيمۆولىنا اينالعان اباي قۇنانباي ۇلىنىڭ دومبىراسى دا ۇسىنىلدى.
جالپى كورمەنى 12 مىڭنان استام ادام تاماشالادى.
- جوبا ۇلكەن قىزىعۋشىلىق تۋدىردى، بۇل قازاقستان مەن ماجارستان اراسىنداعى مادەني بايلانىستىڭ ماڭىزدىلىعىن كورسەتەدى. بۇعان دەيىن وسىنداي كورمەلەر تۇركيا، وڭتۇستىك كورەيا، اۋستريا، يتاليا جانە چەحيادا وتكەن. ەندى 12-جەلتوقساندا سەربيادا «ۇلى دالانىڭ مادەني مۇراسى» اتتى كورمە اشىلادى. جالپى قالا اكىمى مادەنيەت سالاسى وكىلدەرىن دامىتۋعا ىقپال ەتەتىن تاعىلىمداماعا، ءبىلىم الۋعا باعىتتالعان جانە حالىقارالىق بايلانىستى نىعايتۋعا مۇمكىندىك جاسايتىن جوبالارعا ەرەكشە كوڭىل بولەدى. ماسەلەن، مۋزەي قىزمەتكەرلەرى الەمنىڭ ۇزدىك مادەني ورتالىقتارىندا، سونىڭ ىشىندە ايگىلى لۋۆردا ءبىلىم الىپ قايتتى، - دەدى الماتى قالاسى مادەنيەت باسقارماسىنىڭ باسشىسى عاني مايلىبايەۆ.
ەسكە سالايىق، وتكەن ايدا قازاقستان پرەزيدەنتى ماجارستانعا مەملەكەتتىك ساپارمەن بارعان بولاتىن.
