ماجارستان پرەزيدەنتى قازاقستانعا رەسمي ساپارمەن كەلەدى
استانا. KAZINFORM - ماجارستاننىڭ پرەزيدەنتى تاماش شۋيوك جانە پارلامەنت سپيكەرى لاسلو كيەۆەردىڭ قازاقستانعا رەسمي ساپارپەن كەلەدى.
بۇگىن ماجارستاننىڭ سىرتقى ەكونوميكالىق بايلانىستار جانە سىرتقى ىستەر ءمينيسترى پەتەر سييارتو قازاقستانعا رەسمي ساپارمەن كەلدى.
ساپار اياسىندا قازاقستان رەسپۋبليكاسى پرەمەر- ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋمەن شاعىن جانە كەڭەيتىلگەن قۇرامداعى كەلىسسوز وتكىزدى.
- ماجارستان - ەۋروپاداعى سەنىمدى ستراتەگيالىق سەرىكتەس ەل. تاريح پەن رۋحاني شەجىرە دە ورتاقتاستىق كوپ، باۋىرلاس مەملەكەت. ءبىز بۋداپەشتپەن پراگماتيۆتى جانە ءوزارا مۇددەنى قولداۋعا باعىتتالعان بەرىك ءارى ۇزاق مەرزىمدە دامىتۋعا ءمان بەرەمىز. سوڭعى 30 جىلدا جاڭعىرعان ەكىجاقتى قارىم- قاتىناس مازمۇندى ساياسي ديالوگ پەن قارقىندى ساياسي- ەكونوميكالىق، ينۆەستيتسيالىق كووپەراتسيامەن ءورىسى كەڭ مادەني- گۋمانيتارلىق بايلانىسپەن ەرەكشەلەنەدى. اسىرەسە قازاقستاننىڭ پرەزيدەنتى قاسىم-جومارت توقايەۆ پەن ماجارستان پرەمەر- ءمينيسترى ۆيكتور ورباننىڭ ءوزارا ساپارلارى ساياسي ديالوگقا نىعايتىپ، ءاردايىم تىڭ ديناميكا بەرىپ كەلەدى، - دەدى مۇرات نۇرتىلەۋ رەسمي كەزدەسۋدەن كەيىن ب ا ق وكىلدەرىنە مالىمدەمە جاساۋ بارىسىندا.
ءمينيستردىڭ ايتۋىنشا، پارلامەنت ارالىق قاتىناس ەكى ەلدىڭ ءوزارا ىنتىماقتاستىعىنا سەرپىن بەرۋدە.
- بۇگىن ەلىمىزگە رەسمي ساپارمەن كەلگەن دەلەگاتسيا قۇرامىندا ماجارستان ۇلتتىق اسسامبلەياسىنىڭ دوستىق توبىنىڭ پارلامەنتشىلەرى بار. ساياسي ماسەلەلەرگە كەلسەك، بيىل ماجارستاننىڭ پرەزيدەنتى تاماش شۋيوك جانە پارلامەنت سپيكەرى لاسلو كيەۆەردىڭ ەلىمىزگە رەسمي ساپارىن ۇيىمداستىرۋ جوسپارلانىپ وتىر. ارينە، بيىلدىڭ قىسقاشا عانا ءتىزىمى، بولاشاقتا ءبىز ەكپىندى، بەلسەندى ساياسي ديالوگتى جالعاستىرۋعا ءمان بەرەمىز، - دەيدى ول.
ەسكە سالا كەتسەك، بيىل 17-قاڭتاردا قاسىم-جومارت توقايەۆ پەن ماجارستان پرەمەر- ءمينيسترى ۆيكتور وربان ەكىجاقتى كۇن ءتارتىبىنىڭ وزەكتى ماسەلەلەرىن تالقىلاپ، قازاقستان مەن ماجارستان اراسىنداعى ستراتەگيالىق سەرىكتەستىككە وڭ باعا بەردى.
