ماجار كومپانياسى قازاقستاننىڭ بىرنەشە وڭىرىندە كۇن ەلەكتر ستانساسىن سالادى

بۇل تۋرالى ماجارستان پرەمەر-ءمينيسترى ۆيكتور وربان مەن مەملەكەت باسشىسى قاسىم-جومارت توقايەۆتىڭ اقورداداعى كەزدەسۋدەن كەيىنگى بىرلەسكەن مالىمدەمەسىنەن ءمالىم بولدى، دەپ حابارلايدى Kazinform اگەنتتىگى.

«قازىرگى تاڭدا قوس مەملەكەت اراسىندا شەشىمىن تاپپاعان ماسەلە جوق. بۇگىن ۆيكتور وربان مىرزامەن ستراتەگيالىق سەرىكتەستىكتى ودان ءارى تەرەڭدەتۋگە باعىتتالعان ناتيجەلى كەلىسسوز جۇرگىزدىك. جان-جاقتى ارىپتەستىكتى، ىقپالداستىقتى نىعايتۋ حالىقتارىمىزدىڭ مۇددەسىنە ساي كەلەدى. ءبىز بۇگىن ناقتى ءارى ماڭىزدى كەلىسسوزگە قول جەتكىزدىك. اسىرەسە ەكىجاقتى ساۋدا-ساتتىق كولەمىن ۇلعايتۋعا جانە ينۆەستيتسيالىق ىنتىماقتاستىقتى دامىتۋعا باسا ءمان بەردىك. وسى ورايدا تاۋار ءتۇرىن كوبەيتىپ، جاڭا مۇمكىندىكتەردى پايدالانۋ اسا ماڭىزدى»، — دەدى مەملەكەت باسشىسى.

قاسىم-جومارت توقايەۆ قازاقستان ماجارستانعا قۇنى شامامەن 700 ميلليون دوللار بولاتىن 95 ءتۇرلى تاۋار جەتكىزە الاتىنىن اتاپ ءوتتى.

«ەنەرگەتيكا، مەتاللۋرگيا، ماشينا جاساۋ، مۇناي-حيميا، اۋىل شارۋاشىلىعى جانە قۇرىلىس سالالارى بويىنشا ءونىم ەكسپورتتاۋعا مۇمكىندىك بار. ءبىز ينۆەستيتسيالىق سەرىكتەستىكتى ودان ءارى جانداندىرۋ ءۇشىن ءىرى جوبالاردى بىرلەسىپ ىسكە اسىرامىز دەپ ۋاعدالاستىق. سوندىقتان ءوزارا ءتيىمدى جوبالار ءتىزىمى ازىرلەنەدى»، - دەدى پرەزيدەنت.

ونىڭ ايتۋىنشا، باتىس قازاقستان وبلىسىنداعى روجكوۆ گاز كەنىشى جىل سوڭىنا دەيىن ىسكە قوسىلادى.

«وندا ماجارستاننىڭ MOL مۇناي-گاز كومپانياسىنىڭ ۇلەسى 192 ميلليون دوللار بولماق. سونداي-اق، Globalia كاسىپورنى ەلىمىزدىڭ ءبىرقاتار ايماعىندا كۇن ەنەرگيا ستانسالارىن سالۋدى جوسپارلاپ وتىر. جوبانىڭ قۇنى - 150 ميلليون دوللار»، — دەدى قاسىم-جومارت توقايەۆ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى