مادەني-تۋريستىك ءىس-شارالاردى برەند رەتىندە قالىپتاستىرۋ قاجەت - ۇلتتىق قۇرىلتاي

- تۋريزم - ايماقتاردىڭ دامۋىنا سەرپىن بەرەتىن سالا بولۋعا ءتيىس. جەرگىلىكتى جەردەگى رەسپۋبليكالىق جانە حالىقارالىق ءىس-شارالار وڭىرلەردىڭ تۋريستىك الەۋەتىن ارتتىرۋعا ىقپال ەتەدى. بيىل تارازدا وتەتىن «دوستاستىق جارمەڭكەسى» وسىنداي جوبانىڭ ءبىرى بولماق. جارمەڭكەگە كوپتەگەن ەلدىڭ قولونەرشىلەرى مەن اۋىل شارۋاشىلىعى ماماندارى شاقىرىلدى، - دەدى قاسىم-جومارت توقايەۆ بۋرابايدا ءوتىپ جاتقان ۇلتتىق قۇرىلتايدا.

مەملەكەت باسشىسىنىڭ مالىمدەۋىنشە، اتالعان ءىس-شارا سەرىكتەس ەلدەرمەن ەكونوميكالىق بايلانىسىمىزدى ودان ءارى كۇشەيتە تۇسەدى.

- سونىمەن قاتار ەڭ كونە ساۋدا جانە مادەنيەت ورتالىعىنىڭ ءبىرى - تاراز قالاسىنىڭ بەدەلىن ارتتىرا تۇسەدى، وبلىسقا جاڭا ينۆەستيتسيا تارتۋعا جانە تۋريستەردىڭ كوپتەپ كەلۋىنە سەپتىگىن تيگىزەدى. جالپى ءار ايماقتا جۇرتشىلىق اسىعا كۇتەتىن ءارى داستۇرگە اينالعان وسىنداي ماڭىزدى مادەني-تۋريستىك ءىس-شارالار ءوتىپ تۇرادى. ونى نەگىزىنەن دەمەۋشىلەردىڭ قاراجاتى ەسەبىنەن ۇيىمداستىرعان ءجون. ءىس-شارالاردى جىل بويى جالعاساتىنداي ەتىپ بىركەلكى ءبولۋ، برەند رەتىندە قالىپتاستىرىپ، جارنامالاۋ قاجەت. ءاربىر وقيعا بۇقارالىق اقپارات قۇرالدارى ارقىلى كورسەتىلىپ، ەل ىشىندە جانە شەتەلدەردە جۇرت نازارىنا ىلىگۋگە ءتيىس. مۇنىڭ ءبارى ادامداردىڭ ايماقتارعا قىزىعۋشىلىعىن ارتتىرىپ، تۋريزمدى دامىتۋعا مۇمكىندىك بەرەدى، - دەيدى پرەزيدەنت.

بۇعان دەيىن قاسىم-جومارت توقايەۆ شەكارالىق ەلدى مەكەندەردىڭ احۋالىنا توقتالعان ەدى.

سونىمەن قاتار مەملەكەت باسشىسى ۇلتتىق قۇرىلتايدا قازاق حالقىن دانىشپان دەپ ايتساق، قاتەلەسپەيمىز دەگەن بولاتىن.

اۆتور

داۋلەت ىزتىلەۋ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى