ماگدەبۋرگتەگى تەراكت. توقايەۆ گەرمانيا پرەزيدەنتىنە كوڭىل ايتتى
استانا. KAZINFORM — مەملەكەت باسشىسى گەرمانيا پرەزيدەنتى فرانك- ۆالتەر شتاينمايەرگە كوڭىل ايتۋ جەدەلحاتىن جىبەردى. بۇل تۋرالى اقوردانىڭ باسپا ءسوز قىزمەتى ءمالىم ەتتى.
قاسىم-جومارت توقايەۆ ماگدەبۋرگ قالاسىنداعى جارمەڭكەدە ورىن العان جانتۇرشىگەرلىك وقيعا سالدارىنان بىرنەشە ادامنىڭ قازا تابۋىنا بايلانىستى گەرمانيا فەدەراتيۆتىك رەسپۋبليكاسىنىڭ فەدەرالدىق پرەزيدەنتى فرانك-ۆالتەر شتاينمايەرگە كوڭىل ايتتى.
— دوستاس گەرمان حالقىنىڭ اۋىر قايعىسىنا ورتاقتاسىپ، ەلىمىزدىڭ جانە ءوز اتىمنان مارقۇمداردىڭ تۋعان- تۋىستارىنا كوڭىل ايتامىن. سونداي-اق زارداپ شەككەندەردىڭ تەزىرەك ساۋىعىپ كەتۋىنە تىلەكتەستىك بىلدىرەمىن، — دەپ جازىلعان جەدەلحاتتا.
ەسكە سالساق، جۇما كۇنى كەشكە قارا ءتۇستى BMW جۇرگىزۋشىسى كولىكتى ماگدەبۋرگتەگى (ساكسونيا-انحالت فەدەرالدى شتاتى) روجدەستۆولىق بازارعا ادەيى باعىتتاپ، بىرنەشە ادامدى قاقتى.
كەيىننەن كولىك جۇرگىزۋشىسىنىڭ 1974-جىلى تۋعان ساۋد ارابياسىنىڭ تۋماسى ەكەنى انىقتالدى.
بۇل وقيعادان كەيىن ساۋد ارابياسى ماگدەبۋرگ بازارىنداعى لاڭكەستىك ارەكەتتى ايىپتايتىنىن ايتتى.
