ماگدەبۋرگتەگى لاڭكەستىك ارەكەت: كۇدىكتىگە ايىپ تاعىلدى
استانا. KAZINFORM - قاماۋدا وتىرعان ساۋد ارابياسىنىڭ 50 جاستاعى پسيحياترىنا كىسى ءولتىردى جانە ولتىرۋگە وقتالدى دەگەن بىرنەشە ايىپ تاعىلىپ وتىر، دەپ حابارلايدى Euronews.
اتاپ وتىلگەندەي، ەر ادام گەرمانيادا جيىرما جىلعا جۋىق ۋاقىت تۇرىپ جاتقان، ءبىراق شابۋىلعا نە سەبەپ بولعانى ءالى بەلگىسىز.
سەنبى كۇنى كەشكە ماگدەبۋرگتە 2 مىڭنان استام ادام قاتىسقان اسىرە وڭشىلدار شەرۋىندە توبەلەس پەن تارتىپسىزدىكتەر ورنادى.
ارالارىندا كەيبىرەۋى قارا بالاكلاۆا كيگەن نارازىلار يمميگرانتتار مەن ەتنيكالىق نەمىستەر سانالمايتىن ادامداردى جاپپاي دەپورتاتسيالاۋدى جاقتايتىن اسىرەتوڭشىل جاقتاستار اراسىندا تانىمال تەرمين «رەەميگراتسيا» دەگەن جازۋى بار ۇلكەن پلاكات ۇستادى.
سۋديا كۇدىكتى تالەب ابدۋلموحسەندى بەس ادام ءولتىرۋ، سونداي-اق كىسى ولتىرۋگە وقتالۋ جانە دەنەگە اۋىر جاراقات سالۋ بويىنشا سوتقا دەيىن قاماۋعا الۋدى بۇيىردى.
ەسكە سالساق، جۇما كۇنى كەشكە قارا ءتۇستى BMW جۇرگىزۋشىسى كولىكتى ماگدەبۋرگتەگى (ساكسونيا- انحالت فەدەرالدى شتاتى) روجدەستۆولىق بازارعا ادەيى باعىتتاپ، بىرنەشە ادامدى قاقتى. Bild گازەتىنىڭ حابارلاۋىنشا، كەم دەگەندە 11 ادام قازا تاۋىپ، 80 گە جۋىق ادام جارالانعان، ءبىراق رەسمي تۇردە تەك ەكى ءولىم، ونىڭ ىشىندە ءبىر بالا راستالدى. ساكسونيا- انحالت پەن ماگدەبۋرگ بيلىگى بۇل وقيعانى تەراكت دەپ اتادى.
كەيىننەن جۇرگىزۋشىنىڭ ۇستالعانى حابارلاندى. ونىڭ 1974 -جىلى تۋعان ساۋد ارابياسىنىڭ تۋماسى ەكەنى انىقتالدى.
اۆتور
زارينا تۋعانبايەۆا
