ماداگاسكاردا ادام ساۋداسىمەن اينالىسقان قىتاي ازاماتتارى ۇستالدى
استانا. KAZINFORM - ماداگاسكار پوليسياسى حالىقارالىق نەكە ارقىلى ادام ساۋداسىمەن اينالىسقان قىلمىستىق توپتى اشكەرەلەپ، بىرنەشە قىتاي ازاماتىن ۇستادى، دەپ حابارلاندى ماداگاسكارداعى قىتاي ەلشىلىگىنىڭ رەسمي سايتىندا.
قىتاي ەلشىلىگى 12-ناۋرىز كۇنى جاريالاعان مالىمدەمەدە ماداگاسكار پوليسياسىنىڭ ادام ساۋداسى بويىنشا ءبىرقاتار قىلمىستى اشقانى جانە قىلمىسقا قاتىسى بار قىتاي ازاماتتارىن تۇتقىنداعانى ايتىلعان.
قىتاي ەلشىلىگى زاڭسىز ارەكەتتەردىڭ كەز كەلگەن تۇرىنە قارسى ەكەنىن جانە ماداگاسكار كۇشتىك قۇرىلىمدارىنىڭ ادام ساۋداسىمەن كۇرەسۋ ماقساتىندا قولدانعان شارالارىن قولدايتىنىن مالىمدەدى. سونىمەن قاتار، قىتاي ازاماتتارىنا حالىقارالىق نەكەگە قاتىستى زاڭ تالاپتارىن قاتاڭ ساقتاۋدى ەسكەرتتى.
مالىمدەمەدە ايتىلعانداي، قىتاي زاڭناماسىنا سايكەس، كەز كەلگەن نەكە اگەنتتىگى ەل ازاماتتارىنا شەتەلدىكتەرمەن نەكەگە تۇرۋ ماقساتىندا جەڭگەتايلىق قىزمەت كورسەتە المايدى. جەكە تۇلعالاردىڭ الاياقتىق جولىمەن نەمەسە پايدا تابۋ ماقساتىندا حالىقارالىق نەكە دەلدالدىعىمەن اينالىسۋىنا دا قاتاڭ تىيىم سالىنعان.
سونىمەن قاتار، قىتاي ەلشىلىگى ماداگاسكار زاڭىنا سايكەس، شەتەل ازاماتتارى ەلگە كىرگەننەن كەيىن ۆيزا ساناتىنا سايكەس كەلمەيتىن قىزمەتپەن اينالىسا المايتىنىن ەسكە سالدى.
ماداگاسكاردىڭ ۆيزالىق جۇيەسىندە «نەكە قيۋ» ماقساتىندا ارنايى ۆيزا قاراستىرىلماعان، ال اۋەجايدا راسىمدەلەتىن ۆيزالار تەك تۋريستىك ماقساتتا عانا بەرىلەدى.
وسىعان وراي، قىتاي ازاماتتارىنا قولىنداعى ۆيزاسىنىڭ ساناتىن جانە ونىڭ قانداي ماقساتقا سايكەستىگىن مۇقيات تەكسەرۋ، سونداي- اق ۆيزانىڭ جارامدىلىق مەرزىمى اياقتالعانعا دەيىن ەلدەن شىعۋ قاجەتتىلىگى ەسكەرتىلدى.
