ماڭعىستاۋداعى ۇ ق ك شەكارا قىزمەتىندە اعايىندى ۇشەم قىزمەت ەتەدى
ماڭعىستاۋ وبلىسىندا ق ر ۇ ق ك شەكارا قىزمەتىندە كەلىسىمشارت بويىنشا اعارىس، بەكارىس جانە جانارىس ەسىمدى اعايىندى ۇشەم سارباز قىزمەت ەتەدى. اعايىندى زەكەنوۆتەر جاعالاۋ كۇزەتىنىڭ ءبىرىنشى ديۆيزيونىندا ءبىر جىلدان استام ۋاقىتتان بەرى مەرگەن قىزمەتىندە ءجۇر، دەپ حابارلايدى قازاقپارات ءتىلشىسى.
ولاردىڭ اسكەري قىزمەتتەگى باستى مىندەتى — بولىمشەگە قاراستى نىسانداردى كۇزەتۋ جانە ءارتۇرلى ناريادتاردا قىزمەت اتقارۋ، اتاپ ايتساق، ىشكى قاراۋىل، باقىلاۋ- وتكىزۋ پۋنكتى بويىنشا كەزەكشىلىك، پارك بويىنشا كەزەكشىلىك.
اسكەري قىزمەتتە وتكەرگەن قىسقا مەرزىم ىشىندە ەگىزدەر ايتارلىقتاي ناتيجەلەرگە قول جەتكىزگەن، ءبىرىنشى ديۆيزيون كومانديرى مەن دەپارتامەنت باستىعىنىڭ گراموتالارىمەن ماراپاتتالعان.
«اعايىندى زەكەنوۆتار وتە ادەپتى جانە ادال بالالار. ولار وزدەرىنىڭ قىزمەتتىك مىندەتتەرىنە ادال جانە جاۋىنگەرلىك جانە مەملەكەتتىك- قۇقىقتىق دايىندىقتا ۇزدىك ناتيجە كورسەتەدى. مەنىڭ ويىمشا، جىگىتتەردىڭ اسكەري قىزمەتتە بولاشاعى زور»، - دەپ ءبولىستى جاعالاۋ كۇزەتىنىڭ ءبىرىنشى ديۆيزيونىنىڭ كۇزەت توبىنىڭ كومانديرى مايور امانتاي كوشاكوۆ.
اعارىس، بەكارىس جانە جانارىس ەسىمدى باۋىرلاردىڭ بايلانىسىن اسكەردەگى قىزمەت بەكىتە تۇسكەن. بولاشاقتا اعايىندىلار ۇقك شەكارا قىزمەتى اكادەمياسىنا ءتۇسىپ، وفيتسەر بولعىلارى كەلەدى.
«تۋمالاس بولعاسىن بالا كۇنىمىزدەن ءبىز ءارقاشان بىرگە بولدىق، ءبىر مەكتەپتە جانە ءبىر كوللەدجدە وقىدىق، ال وتان الدىنداعى بورىشىمىزدى وتەۋ ۋاقىتى كەلگەندە ءبىر بولىمگە قىزمەت ەتۋدى وتىندىك. ءبىز بالا كەزىمىزدەن اسكەري بولۋدى ارماندادىق، سوندىقتان مەرزىمدى قىزمەتتەن كەيىن كەلىسىمشارت نەگىزىندەگى اسكەري قىزمەتكە شاقىرتۋ الدىق»، - دەدى بەكارىس.
كىشكەنتاي ايىرماشىلىقتارى بولعانىمەن اعايىندىلار ءبىر- بىرىنە وتە ۇقساس. اعارىس پەن بەكارىس بالا كەزىنەن كاراتە- دو سپورتىمەن شۇعىلدانعان. ال جانارىس - سامبودان سپورت شەبەرىنە ۇمىتكەر.
