ماڭعىستاۋدا بوزجىرا شاتقالىندا ۆيزيت ورتالىعى سالىنادى

وسى ورايدا، وتاندىق ينۆەستورلار جەكە قاراجاتىنا بوزجىرادا جىلىنا 30-40 مىڭ تۋريستى قابىلدايتىن ۆيزيت ورتالىعىن جانە تۋريستىك نىساندار سالۋدى كوزدەپ وتىر. جاڭا جوبانى شارىن، كولساي، ايۋساي سىندى تۋريستىك ايماقتارىنداعى ۆيزيت ورتالىقتارىنىڭ قۇرىلىسىن جۇرگىزگەن الەمدىك دەڭگەيدە تاجىريبەسى بار وتاندىق كومپانيا جاساقتاعان.

جوبانىڭ تانىستىرىلىمى جاڭاوزەن قالاسىندا ءوتتى. قوعامدىق تىڭداۋعا ارداگەرلەر، تابيعات جاناشىرلارى جانە ساراپشىلار قاتىستى. جوبا اۆتورلارىنىڭ ايتۋىنشا، ورتالىق بارلىق ەكولوگيالىق تالاپتاردى ءارى تۇراقتى تۋريزم پرينتسيپتەرىن ەسكەرە وتىرىپ سالىناتىن بولادى. قۇرىلىس جۇمىستارىن 2026-جىلدىڭ سوڭىندا اياقتاۋ جوسپارلانعان.

- ورتالىق جينالمالى جەڭىل كونسترۋكسيالاردان تۇرعىزىلادى، ولار تەرەڭ ىرگەتاستى قاجەت ەتپەيدى. عيمارات مەكەننىڭ جەر بەدەرىنە قاراي 400 دەن 1000 م م بيىكتە تۇراتىن بولادى. سۋمەن، ەلەكترمەن جابدىقتاۋ جانە قالدىقتاردى وڭدەۋ ماسەلەلەرى قورشاعان ورتاعا مەيلىنشە زيان تيگىزبەيتىندەي ەتىپ شەشىلگەن. قالدىق سۋدى تازارتاتىن بيوتازارتۋ جۇيەلەرى، قوقىستى سۇرىپتاپ جيناۋ، كۇن ساۋلەسىمەن قورەكتەندىرۋ قاراستىرىلعان، - دەيدى جوبا اۆتورلارى.

جوبانىڭ ماقساتى - تابيعي لاندشافت پەن مادەني مۇرانى ساقتاي وتىرا، ساياحاتتاۋشىلاردى كوشپەندى وركەنيەت الەمىنە جەتەلەپ، قازاق حالقىنىڭ تاريحىن، سالت-ءداستۇرىن ناسيحاتتاۋ.

تۋريستىك نىساندار بوزجىرانىڭ تومەنگى جاعىنان دا بوي كوتەرەدى. مۇندا ەتنواۋىل ستيلىندە تۋريستىك قالاشىق، ەكو-گلەمپينگتەر مەن باسقا دا تۋريستىك نىساندار سالىنباق. جوبا ءساتتى جۇزەگە اسسا، تۇراقتى 70 جۇمىس ورنى اشىلماق.

- بوزجىرا ماسەلەسى اقىرى ورنىنان قوزعالدى-اۋ. ءبىراق تەك بوزجىرا ەمەس، مەنىڭ ويىمشا ايراقتى، جىعىلعان، تۇزبايىر، تورىشتا دا قوناق ۇيلەر سالىنۋى كەرەك. گرۋزيا، تۇركيا، ازەربايجاننان قاي جەرىمىز كەم؟ ءبىز، ارينە قولدايمىز، - دەدى جاڭاوزەن قالاسىنىڭ تۇرعىنى ورازعالي قاسپايەۆ.

جوبا جۇزەگە اسىرىلسا، جاقىن ماڭداعى ەلدىمەكەننىڭ تۇرعىندارىنا دا قولايلى بولماق. ولار اۋىلشارۋاشىلىعى ونىمدەرىن، قولونەر بۇيىمدارىن ساتۋعا مۇمكىندىك الادى.

- ەندى توقتاماۋ كەرەك. تۇبىندە ماڭعىستاۋدىڭ ەكونوميكاسىنىڭ نەگىزگى بولىگى تۋريزم بولاتىنى ءسوزسىز. ءبىز بولاشاق جاستارىمىزدى تۋريزم، بيوتەحنولوگيا، اتوم ەنەرگەتيكاسى، جاساندى ينتەللەكت، سيفرلاندىرۋ سياقتى ماماندىقتارعا وقىتۋىمىز كەرەك، - دەدى قالا تۇرعىنى ءسابيت توكەنوۆ.

قوعامدىق تىڭداۋدىڭ قورىتىندىسى بويىنشا جوبا قولداۋ تاپتى.

بۇعان دەيىن ماڭعىستاۋدا اۋا رايىنا بايلانىستى بارلىق باعىتتاعى جولدىڭ جابىلعانىن جازعان بولاتىنبىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى