ماڭعىستاۋ وبلىسىندا تەك شەتەل ازاماتتارىنا ارنالعان كازينو اشىلماق

- ويىنحاناعا تەك شەتەلدىك تولقۇجاتپەن كىرە الادى. مۇنداي تاجىريبە بار. مىسالى، جالاقى الىپ، سوسىن ويىنحاناعا بارىپ ۇتىلىپ قالدىڭىز، ارينە رەنىشتى. بۇل كىمگە كەرەك؟ ءبىزدىڭ ماقسات شەتەلدەن كەلەتىن ادام قازاقستان ەكونوميكاسىنا اقشا قالدىرىپ كەتۋى كەرەك، - دەدى نۇرداۋلەت قيلىباي ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

وسىلايشا اكىم تابىستىڭ سىرتتان كەلگەنىن قالاپ وتىر.

- تەك كازينو ەمەس، مەيرامحانا نەمەسە قوناق ءۇي قۇرىلىسىنا شەتەلدىكتەر، قازاقستاندىقتار ينۆەستيتسيا سالا الادى. باستىسى ينۆەستيتسيا سالىپ، ەكونوميكامىزعا ۇلەس قوسسا بولعانى. ازىرگە (كازينو - اۆتور) زاڭ شىققان جوق، بۇل ءبىزدىڭ ۇسىنىس، - دەيدى ءوڭىر باسشىسى.

ودان بولەك، ن. قيلىباي بايانداماسىندا «كەندىرلى» كۋرورتتىق ايماعىندا ويىن-ساۋىق تۋريزمىن دامىتۋ تۋرالى ايتىپ قالدى.

- پرەزيدەنت ءوز جولداۋىندا «كەندىرلى» كۋرورتتىق ايماعىنىڭ پوتەنتسيالىن ودان ءارى دامىتۋ قاجەت ەكەنىن اتاپ ءوتتى. قازىر كۋرورتتىق ايماقتىڭ باس جوسپارى ازىرلەندى. ءبىز كەندىرلىنىڭ دامۋىنا وڭ سەرپىن بەرۋ ءۇشىن ءداستۇرلى جاعاجاي جانە ەكو-تۋريزمنەن بولەك «ويىن-ساۋىق تۋريزمى سياقتى قوسىمشا باعىتتى دا دامىتۋ ءجون دەپ ەسەپتەيمىز. بۇگىندە بۇل باعىتتا مۇددەلى ورگاندارمەن پىسىقتاۋ جۇمىستارى جۇرگىزىلۋدە، - دەپ تولىقتىردى ماڭعىستاۋ اكىمى.

بۇعان دەيىن اقتاۋدى باكۋ مەن دۋباي قالالارىنىڭ ۇلگىسى بويىنشا دامىتۋ ءۇشىن باس جوسپارعا وزگەرىس ەنگىزىلگەنىن حابارلاعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى