ماڭعىستاۋ اكىمى كادر ماسەلەسىنە قاتىستى: كەيبىرىنە «كەت» دەپ ايتۋعا تۋرا كەلدى
استانا. KAZINFORM - ماڭعىستاۋ وبلىسىنا نۇرداۋلەت قيلىباي اكىم بولىپ تاعايىندالعاننان كەيىن ورىنباسارلارىنىڭ كوبى قىزمەتتەن كەتتى. ونىڭ ۇستىنە قازىر ءبىراز باسقارمادا باسشى جوق.
ماڭعىستاۋدا كادر جوق پا الدە اكىمنىڭ تالابىنان شىعۋ قيىن با؟ بۇل سۇراقتى نۇرداۋلەت قيلىبايدىڭ وزىنەن سۇراعان ەدىك.
- جاسىرمايمىن، كەيبىر ارىپتەستەرىمىزگە كەت دەپ ايتۋعا تۋرا كەلدى. سەبەبى پرەزيدەنت تاپسىرمالارىنىڭ ۋاقتىلى ورىندالماۋى كەسىرىنەن. بۇل پروبلەما بىرنەشە جىلعا سوزىلىپ كەلە جاتىر. سوندىقتان كەيبىر ارىپتەستەرىمىزدى اۋىستىرۋعا ءماجبۇر بولدىق. كەيبىرەۋلەرى جۇمىستان وزدەرى كەتەمىز دەدى، كەتەم دەگەن ادامدى قالاي ۇستاپ قالاسىڭ؟ كەلىسىم بەرۋگە تۋرا كەلدى، - دەدى نۇرداۋلەت قيلىباي ءوڭىردىڭ الەۋمەتتىك-ەكونوميكالىق دامۋى تۋرالى ەسەپ بەرە تۇرىپ.
وبلىس باسشىسىنىڭ ايتۋىنشا، ءقازىر ءۇش باسقارما باسشىسىنىڭ ورنى بوس تۇر.
- قازىر كەلەتىن باسقارما باسشىلارىنا تالاپ كۇشەيدى. جەكە ساپا بويىنشا ەمتيحان تاپسىرادى، كەيبىر ادامدار وتە الماي جاتىر، كەيبىرى ءوتىپ جاتىر. تاعى ءبىر جايت، باسقارما باسشىلارىنىڭ ماماندىعى دالمە ءدال بولۋ تالابى بار. مىسالى، تابيعي رەسۋرستار باسقارماسىنا باسشى بولىپ كەلۋ ءۇشىن ماماندىعى مىندەتتى تۇردە ەكولوگ بولۋى ءتيىس. قازىر ءبىز ىرىكتەۋ بارىسىندامىز، كونكۋرسقا قاتىسىپ، وتەم دەگەن ادامعا ەسىگىمىز اشىق. تاعى دا ايتا كەتەيىن، كەت، ورىندى بوسات دەپ ايتۋعا تۋرا كەلدى، كوپشىلىگى ءوزىنىڭ ەركىمەن ارىزدارىن جازىپ كەتىپ قالدى. مەن تالاپشىلمىن با، الدە تالاپشىل ەمەسپىن بە بىلمەيمىن، قاراماعىمداعى كىسىلەر ايتاتىن شىعار، - دەپ تولىقتىردى ءوڭىر اكىمى.
جاقىندا بەلگىلى بولعانداي اقتاۋدا پرەزيدەنتتىڭ بۇرىنعى رەزيدەنتسياسىنىڭ ورنىنا مەشىت پەن ستاديون سالىنادى.
