ماعان جالعان پسيحولوگتەر مەن «كوۋچتار» ۇستىنەن تۇسەتىن شاعىم كوبەيىپ كەتتى - پرەزيدەنت
بۋراباي. KAZINFORM - پرەزيدەنت قاسىم-جومارت توقايەۆ بۋرابايدا ءوتىپ جاتقان ۇلتتىق قۇرىلتايدىڭ IV وتىرىسىندا قۇقىق قورعاۋ ورگاندارىن جالعان پسيحولوگتار مەن «كوۋچتاردىڭ» ارەكەتىنە ءجىتى باقىلاۋ ورناتۋدى تاپسىردى.
- قۇرىلتاي مۇشەلەرى تاعى ءبىر جايتقا الاڭداۋشىلىق ءبىلدىرىپ وتىر. سوڭعى كەزدە ەل ىشىندە ءتۇرلى الاياقتىق ارەكەتتەر جيىلەپ بارادى. تەرىس پيعىلدى ادامدار قايىرىمدىلىققا دەپ اقشا جيناپ، ونى جەكە باسىنىڭ پايداسىنا جاراتادى. سونداي-اق كوپ ادام ينتەرنەت-الاياقتاردان زارداپ شەگۋدە، - دەدى قاسىم-جومارت توقايەۆ.
مەملەكەت باسشىسى قۇرىلتايدا ءسوز العان زاڭگەر ايگۇل ورىنبەكتىڭ ۇسىنىستارىنا قولداۋ ءبىلدىردى.
- بۇدان بولەك، قازىر جۇرتقا اقىل ايتىپ اقشا تاباتىن جالعان پسيحولوگتار مەن «كوۋچتار» كوبەيىپ كەتتى. ولارعا سەنىپ، الدانىپ قالعاندار كوپ. ماعان بۇل تۋرالى كوپتەگەن شاعىم ءتۇسىپ جاتىر. بۇل ماسەلەنى قۇرىلتاي مۇشەسى ايگۇل ورىنبەك دۇرىس كوتەرىپ وتىر. جاۋاپتى ورگاندار بۇل ماسەلەنى دە نازارعا الۋعا ءتيىس، - دەدى پرەزيدەنت.
ايتا كەتۋ كەرەك، قۇرىلتايدىڭ پانەلدىك سەسسيالارى كەشە باستالعان. ول سەكسيالاردىڭ تاقىرىپتارى ازاماتتىق قوعام، مادەنيەت، ونەر، رۋحانيات، ءبىلىم جانە عىلىم، الەۋمەتتىك-ەكونوميكالىق دامۋ ماسەلەلەرىن قامتىدى.
2022 -جىلى ۇلتتىق قۇرىلتاي العاش جاندانعاننان بەرى ەلدەگى الەۋمەتتىك-ەكونوميكالىق ماسەلەلەر شەشىم تاۋىپ كەلەدى. جىل وتكەن سايىن تاقىرىپ اياسى كەڭىدى، ايتىلاتىن سالماقتى وي ۇلعايدى.
اۆتور
ەسىمجان ناقتىباي
