ۇلىتاۋدا 20 جاستاعى جىگىتتىڭ وتباسىندا ەلىمىزدىڭ 20 ميلليونىنشى ازاماتى دۇنيەگە كەلدى
ۇلىتاۋ وبلىسىندا دۇنيەگە كەلگەن 20 ميلليونىنشى ءسابيدى ءوڭىر باسشىلارى قۇتتىقتادى، دەپ حابارلايدى Kazinform.
20 ميلليونىنشى تۇرعىن 20-ايماقتا دۇنيەگە كەلدى. حالىق سانى از ۇلىتاۋ وبلىسى ءۇشىن بۇل -ۇلكەن قۋانىش.
توميريس سۇڭعات قىزى اقىلبەك رەسمي تۇردە 20 ميلليونىنشى قازاقستاندىق رەتىندە تىركەلدى.
ءسابي 14-قاراشا ساعات 08:10 دا سالماعى 3 ك گ جانە بويى 49 س م بولىپ تۋدى. بالا ۋاقىتىندا، 41 اپتادا دۇنيەگە كەلگەن. انا مەن بالانىڭ جاعدايى جاقسى.
«20 ميلليونشى تۇرعىندى دۇنيەگە اكەلەم دەپ ويلامادىم. ماعان كىشكەنتايىمدى امان- ەسەن بوسانۋعا كومەكتەسكەن دارىگەرلەرگە ۇلكەن راحمەت. ءبىز ءۇشىن ەڭ باستىسى، قىزىم ساۋ بولىپ تۋدى. كوپبالالى انا بولعىم كەلەدى. مۇمكىن 21- ميلليوندى دا بوساناتىن شىعارمىن»، - دەيدى جاس انا ايگەرىم مولداشيەۆا.
20 ميلليونىنشى قازاقستاندىقتىڭ كىندىگىن كەسۋ باقىتى 38 جىلدىق تاجىريبەسى بار اكۋشەر- گينەكولوگ ءانجان بايماعامبەتوۆاعا بۇيىردى.
«ءبارى ويداعىداي ءوتتى. وسىنداي وقيعالاردىڭ كوبىرەك بولۋىن تىلەيمىن. ءبىزدىڭ ازاماتتارىمىزدىڭ سانى وسە بەرسىن. ءبىزدىڭ وبلىستا ەلىمىزدىڭ 20 ميلليونىنشى تۇرعىنى دۇنيەگە كەلگەنىنە وتە قۋانىشتىمىز»، - دەيدى اكۋشەر- گينەكولوگ ءانجان بايماعامبەتوۆا.
توميريس - سەيتجانوۆتار وتباسىنداعى العاشقى نەمەرە. سوندىقتان توميريستىڭ اجەسى دۇنيەگە كەلگەن كەزدە كەلىنىنىڭ جانىندا بولعان.
ول بوسانۋعا جاردەمدەسىپ، كوپتەن كۇتكەن نەمەرەسىن العاشقىلاردىڭ ءبىرى بولىپ قولىنا العان.
«بۇل - ءبىزدىڭ ءبىرىنشى نەمەرەمىز. قۋانىشتان جۇرەگىمىز جارىلىپ كەتەردەي بولىپ تۇر. ەرجۇرەك قىز جانە ءوز حالقىنىڭ ادال ازاماتى بولسىن دەگەن نيەتپەن ەسىمىن توميريس دەپ قويدىق»، - دەيدى توميريستىڭ اجەسى گۇلزات كۋمانوۆا.
سۇڭعات سەيتجان قىزىنىڭ دۇنيەگە كەلگەنىن جۇمىستان كەلگەندە ءبىر-اق بىلگەن. جاس اكە «قازاقمىس» كورپوراتسياسىندا ءورت ءسوندىرۋشى بولىپ جۇمىس ىستەيدى.
جاس اكە دەيتىنىمىز ول 20 عا ەندى عانا تولعان.
«ءتىپتى بەيتانىس ادامدار قوڭىراۋ شالىپ، قۇتتىقتاپ جاتىر. بارىنە راحمەت. بىرىنشىدەن، بۇل - اللانىڭ قالاۋى. ەكىنشىدەن، قىزىمنىڭ دۇنيەگە كەلۋىنە كومەكتەسكەنى ءۇشىن دارىگەرلەرگە راحمەت. اتا- انام بىزدەن قاتتى قۋانىپ جاتىر دەسەم بولادى. مەن ءالى تولىقتاي سەزىنگەن جوقپىن. جۇمىستان كەلگەندە عانا جۇبايىمنىڭ بوسانعانىن ەستىدىم. جاس جىگىتتەرگە ەرتە ۇيلەنۋگە كەڭەس بەرەمىن. بالاڭىزبەن بىرگە وسكەن كەرەمەت»، - دەيدى جاس اكە سۇڭعات سەيتجان.
وسىنداي اتاۋلى وقيعانىڭ قۇرمەتىنە وبلىس باسشىلىعى جاس وتباسىنا سىيلىق تابىستادى، ال وتباسى بانكى 2 ميلليون تەڭگەگە سەرتيفيكات بەردى.
سونداي- اق، جەزقازعان اكىمى ءدال وسى كۇنى بوسانعان 10 جاس انانى قۇتتىقتاپ، باعالى سىيلىقپەن قۋانتتى.
ايتا كەتۋ كەرەك، ۇلىتاۋ وبلىسىندا تۋۋ كورسەتكىشى ارتىپ كەلەدى. جىل باسىنان بەرى ايماقتا 3000 نان استام بالا دۇنيەگە كەلگەن.
