ەلىمىزدىڭ اۋەجايلارىندا قىزمەت كورسەتۋ كولەمى 25 پايىزعا ارتتى

«وسى جىلدىڭ 11 ايىندا وتاندىق اۋە كومپانيالارى 12 ميلليون 300 مىڭ جولاۋشى تاسىمالدادى. بۇل وتكەن جىلمەن سالىستىرعاندا 23 پايىزعا جوعارى. جىل قورىتىندىسى بويىنشا اتالعان كورسەتكىشتى 13 ميلليونعا دەيىن جەتكىزۋ جوسپارلانىپ وتىر. اۋەجايلاردا قىزمەت كورسەتۋ كولەمى 25 پايىزعا ارتىپ، 24 ميلليون جولاۋشىنى قۇرادى. ايتارلىقتاي ءوسىم الماتى جانە استانا اۋەجايلارىندا بايقالادى. ولاردا بيىل تيىسىنشە رەكوردتىق 9 ميلليون جانە 7 ميلليون جولاۋشىعا قىزمەت كورسەتىلدى. سونداي-اق، اۋەجايلاردا وڭدەلگەن جۇك كولەمى دە ۇلعايىپ، جىل باسىنان بەرى كورسەتكىش 130 مىڭ توننانى قۇرادى، ياعني، ءوسىم - 16 پايىز»، — دەدى مارات قارابايەۆ.

ونىڭ اتاپ وتۋىنشە، اۋە تاسىمالىنا ءوسىپ كەلە جاتقان سۇرانىستى قاناعاتتاندىرۋ ءۇشىن اۋەجاي ينفراقۇرىلىمىن جاڭعىرتۋ جۇمىستارى جالعاسىپ جاتىر. الداعى جىلدىڭ ناۋرىز ايىندا شىمكەنت، مامىر ايىندا قىزىلوردا جانە ماۋسىم ايىندا الماتى قالالارىنداعى جاڭا اۋەجاي جولاۋشىلار تەرمينالدارىنىڭ قۇرىلىسى اياقتالادى. اتالعان جۇمىستارعا 150 ميلليارد تەڭگەدەن استام جەكە ينۆەستيتسيا تارتىلدى.

«جوبالاردى جۇزەگە اسىرۋ ناتيجەسىندە الماتى قالاسى اۋەجايىنىڭ وتكىزۋ قابىلەتى - 5 ەسە، قىزىلوردا اۋەجايى - 6 ەسە جانە شىمكەنت 7 ەسە ۇلعاياتىن بولادى. كەلەسى جىلى بىرىككەن اراب امىرلىكتەرىنىڭ ينۆەستورى استانالىق اۋەجايدىڭ ۇشۋ-قونۋ جولاعىن ءوز قاراجاتى ەسەبىنەن رەكونسترۋكتسيالاۋعا كىرىسەدى. بۇل جاڭا باسقارۋشى كومپانيانىڭ الدىنا قويىلعان ءبىرىنشى كەزەكتەگى مىندەتتەردىڭ ءبىرى سانالادى. سونداي-اق، 2024-جىلى مەملەكەت باسشىسىنىڭ تاپسىرماسىنا سايكەس پاۆلودار قالاسى اۋەجايىنىڭ ۇشۋ-قونۋ جولاعىن جانە بالقاش قالاسى اۋەجايىنىڭ پەررونى مەن رۋلدەۋ جولاعىن رەكونسترۋكتسيالاۋ بويىنشا جۇمىستار باستالادى»، - دەدى مينيستر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى